1 O Diyos, huwag po sana kayong manahimik.

Huwag po ninyong takpan

ang inyong tainga.

Kumilos po kayo.

2 Tingnan ang inyong mga kaaway,

maingay silang sumasalakay

at ipinagyayabang na mananalo sila.

3 Nagbabalak sila ng masama

laban sa inyong mga mamamayan

na inyong kinakalinga.

4 Sinabi nila, "Halikayo,

wasakin natin ang bansang Israel

upang makalimutan na siya magpakailanman."

5 At nagkasundo sila sa masamang plano nila.

Gumawa sila ng kasunduan laban sa inyo.

6 Sila ay mga taga-Edom, mga Ismaelita,

mga taga-Moab, mga Hagreo,

7 mga taga-Gebal, Amonita, taga-Amalek,

mga taga-Filistia at mga taga-Tiro.

8 Kumampi rin sa kanila ang Asiria,

isang bansang malakas

na kakampi ng lahi ni Lot.*

9 Talunin nʼyo sila Panginoon

katulad ng ginawa nʼyo sa mga Midianita

at kina Sisera at Jabin

doon sa Lambak ng Kison.

10 Namatay sila sa Endor

at ang mga bangkay nilaʼy nabulok

at naging pataba sa lupa.

11 Patayin nʼyo ang mga pinuno nila

katulad ng ginawa ninyo kina Oreb

at Zeeb at kina Zeba at Zalmuna.

12 Sinabi nila, "Agawin natin

ang lupain ng Diyos."

13 O Diyos ko, ikalat nʼyo sila

na parang alikabok o ipa

na nililipad ng hangin.

14,15 Tulad ng apoy na tumutupok

sa mga puno sa kagubatan

at kabundukan,

habulin nʼyo sila ng inyong bagyo

at takutin ng malalakas na hangin.

16 Hiyain nʼyo sila, Panginoon,

hanggang sa matuto silang lumapit sa inyo.

17 Sana nga ay mapahiya

at matakot sila habambuhay.

Mamatay sana sila sa kahihiyan.

18 Para malaman nilang kayo, Panginoon,

ang tanging Kataas-taasang Diyos

sa buong mundo.