1 Purihin ang Panginoon!

Karapat-dapat na purihin ang Panginoon.

2 Buong buhay akong magpupuri sa Panginoon.

Aawitan ko ang aking Diyos

ng mga papuri habang akoʼy nabubuhay.

3 Huwag kayong magtiwala

sa mga makapangyarihang tao o kaninuman,

dahil silaʼy hindi makapagliligtas.

4 Kapag silaʼy namatay, babalik sila sa lupa,

at ang kanilang mga binabalak

ay mawawalang lahat.

5 Mapalad ang tao na ang tulong

ay nagmumula sa Diyos ni Jacob,

na ang kanyang pag-asa ay sa Panginoon,

na kanyang Diyos.

6 ang lumikha ng langit at lupa,

ng dagat at ng lahat ng narito.

Mananatili siyang tapat magpakailanman.

7 Binibigyan niya ng katarungan ang mga inaapi,

at binibigyan ng pagkain ang mga nagugutom.

Pinalalaya ng Panginoon

ang mga bilanggo.

8 Pinagagaling niya ang mga bulag

upang makakita,

pinalalakas ang mga nanghihina,

at ang mga matuwid ay minamahal niya.

9 Iniingatan niya ang mga dayuhan,

tinutulungan ang mga ulila at mga biyuda,

ngunit hinahadlangan niya

ang mga kagustuhan ng masasamâ.

10 Mga taga-Zion, ang Panginoon

na inyong Diyos

ay maghahari magpakailanman.

Purihin ang Panginoon!