1 Kayong mga matuwid,

sumigaw kayo sa galak,

dahil sa ginawa ng Panginoon!

Kayong namumuhay ng tama,

nararapat ninyo siyang purihin!

2 Pasalamatan ninyo ang Panginoon

sa pamamagitan ng mga alpa

at mga instrumentong may mga kuwerdas.

3 Awitan ninyo siya ng bagong awit.

Tugtugan ninyo siya nang buong husay,

at sumigaw kayo sa tuwa.

4 Ang salita ng Panginoon ay matuwid,

at maaasahan ang kanyang mga gawa.

5 Ninanais ng Panginoon ang katuwiran

at katarungan.

Makikita sa buong mundo

ang kanyang pagmamahal.

6 Sa pamamagitan ng salita ng Panginoon,

ang langit ay nalikha;

sa kanyang hininga nagmula ang araw,

buwan at mga bituin.

7 Inipon niya ang dagat*

na parang inilagay sa isang sisidlan.

8 Ang lahat ng tao sa daigdig

ay dapat matakot sa Panginoon,

9 dahil nang siyaʼy nagsalita, nalikha ang mundo;

siyaʼy nag-utos at lumitaw ang lahat.

10 Sinisira ng Panginoon

ang mga plano

ng mga bansang hindi kumikilala sa kanya.

Sinasalungat niya ang kanilang binabalak.

11 Ngunit ang mga plano ng Panginoon

ay mananatili magpakailanman.

At ang kanyang mga balak,

sa saliʼt saling lahi ay matutupad.

12 Mapalad ang bansa na ang Diyos ay ang Panginoon.

At mapalad ang mga taong

pinili niya na maging kanya.

13 Mula sa langit ay minamasdan ng Panginoon

ang sangkatauhan.

14 Mula sa kanyang luklukan,

tinitingnan niya ang lahat

ng narito sa mundo.

15 Siya ang humuhubog sa kanilang puso,

at alam niya ang lahat

ng kanilang ginagawa.

16 Hindi nananalo ang isang hari

dahil sa dami ng kanyang kawal,

at hindi naman naililigtas ang kawal

gamit ang kanyang lakas.

17 Ang mga kabayo ay hindi maaasahan

na maipanalo ang digmaan;

hindi sila makapagliligtas sa kabila

ng kanilang kalakasan.

18 Ngunit binabantayan ng Panginoon

ang mga may takot sa kanya,

sila na nagtitiwala sa kanyang pag-ibig.

19 Silaʼy inililigtas niya sa kamatayan,

at sa panahon ng taggutom,

silaʼy kanyang inaalalayan.

20 Tayoʼy naghihintay nang may pagtitiwala sa Panginoon.

Siya ang tumutulong at nagtatanggol sa atin.

21 Nagagalak tayo,

dahil tayoʼy nagtitiwala

sa kanyang banal na pangalan.

22 Panginoon, sumaamin nawa

ang inyong matapat na pag-ibig.

Ang aming pag-asa ay nasa inyo.