Awit na isinulat ni Solomon.
1 O Diyos, ituro nʼyo po sa hari
ang iyong pamamaraan sa paghatol
at katuwiran,
2 upang makatarungan siyang makapaghatol
sa inyong mga mamamayan,
pati na sa mga dukha.
3 Sumagana sana ang mga kabundukan
upang mapagpala ang inyong mga mamamayan
dahil matuwid ang hari.
4 Tulungan nʼyo siyang maipagtanggol
ang mga dukha
at durugin ang mga umaapi sa kanila.
5 Nawaʼy katakutan ka nila72:5 Sa ibang manuskrito, Manatili sana sila., magpakailanman,
hanggang ang araw ay sumisikat,
hanggang ang buwan ay naroon sa kalangitan.
6 Ang hari sanaʼy maging tulad ng ulan
na bumubuhos sa parang,
ulan na dumidilig sa kalupaan.
7 Umunlad sana ang buhay ng mga matuwid
sa panahon ng kanyang pamumuno,
at maging maayos ang kalagayan ng tao
hanggang sa wakas ng panahon.
8 Lumawak sana nang lumawak
ang kanyang kaharian,72:8 Lumawak … kaharian: Sa literal, Maghari sana siya mula sa dagat hanggang sa dagat.
mula sa ilog ng Eufrates
hanggang sa pinakadulo ng mundo.72:8 mundo: O Israel.
9 Magpasakop sana sa kanya
ang mga kaaway niyang nakatira sa ilang.
10 Magbigay sana ng buwis sa kanya
ang mga hari ng Tarsis,
at mga kaloob ang mga hari
ng Sheba at Seba.
11 Magpasakop sana sa kanya
ang lahat ng hari
at ang lahat ng bansa ay maglingkod sa kanya.
12 Inililigtas niya ang mga dukha
na humihingi ng tulong,
gayundin ang mga mahihirap
na walang tumutulong.
13 Kahahabagan niya ang mga dukha
at nangangailangan
at silaʼy kanyang tutulungan.
14 Ililigtas niya sila sa mga malulupit
at mapang-api
dahil para sa kanya,
ang buhay nilaʼy mahalaga.
15 Mabuhay sana ang hari nang matagal.
Sanaʼy mabigyan siya ng ginto
mula sa Sheba.
Sanaʼy idalangin palagi ng mga tao
na pagpalain siya ng Diyos.
16 Sumagana sana ang ani sa lupain
maging sa tuktok ng bundok,
katulad ng mga ani sa Lebanon.
Dumami rin sana ang mga tao
sa mga lungsod,
kasindami ng damo sa mga parang.
17 Huwag sanang malimutan
ang pangalan ng hari
magpakailanman,
habang sumisikat pa ang araw.
Sa pamamagitan sana niya
ay pagpalain ng Diyos ang lahat ng bansa,
at sabihin sana ng mga ito
na siyaʼy pinagpala ng Diyos.
18 Purihin ang Panginoong Diyos,
ang Diyos ng Israel,
na siyang tanging nakagagawa
ng mga bagay
na kamangha-mangha.
19 Purihin ang kanyang dakilang pangalan
magpakailanman!
Mahayag sana sa buong mundo
ang kanyang kaluwalhatian.
Amen! Amen!
20 Dito nagwawakas ang mga panalangin ni David
na anak ni Jesse.