1 Panginoon, sa inyo ako humihingi ng kalinga.
Huwag nʼyong pabayaang akoʼy mapahiya.
2 Tulungan nʼyo ako at iligtas
sapagkat kayo ay matuwid.
Akoʼy inyong dinggin at sagipin.
3 Kayo sa akin ay batong kanlungan
na lagi kong malalapitan.
Ipag-utos nʼyo na iligtas ako,
dahil kayo ang aking matibay
na batong pananggalang.
4 O Diyos ko, iligtas nʼyo ako
mula sa kamay ng masasama
at malulupit na tao.
5 Kayo ang aking pag-asa,
O Makapangyarihang Panginoon.
Mula noong akoʼy bata pa,
sa inyo, ako ay nagtiwala.
6 Kayo ay aking kasama,
mula nang akoʼy isilang;
sa sinapupunan ng aking ina,
akoʼy inyong iningatan.
Akoʼy magpupuri sa inyo,
magpakailanman.
7 Naging halimbawa ang buhay ko
para sa karamihan,
dahil kayo ang aking naging kalakasan
at tagapag-ingat.
8 Maghapon ko kayong pinapupurihan
dahil sa inyong kahanga-hangang kagandahan.
9 Huwag po ninyo akong iiwan
kapag akoʼy matanda na.
Huwag po ninyo akong pababayaan
kapag akoʼy mahina na.
10 Dahil nag-uusap-usap
ang aking mga kaaway
at nagbabalak na akoʼy patayin.
11 Sinasabi nilang, "Pinabayaan
na siya ng Diyos,
kaya habulin natin siya at dakpin
sapagkat wala namang magliligtas sa kanya."
12 O Diyos ko, huwag nʼyo po akong layuan;
at akoʼy agad ninyong saklolohan.
13 Nawa silang sa akin ay nagpaparatang
ay mapahiya at mapahamak.
Ang mga nagnanais na akoʼy saktan
ang siya sanang kutyain
at malagay sa kahihiyan.
14 Ngunit ako, O Diyos ay palaging aasa
at lalo pang magpupuri sa inyo.
15 Maghapon kong sasabihin
na matuwid kayo at nagliligtas,
kahit na hindi ko lubusang maunawaan.
16 Ihahayag ko ang inyong mga kahanga-hangang gawa,
O Makapangyarihang Panginoon;
Ihahayag ko sa mga tao
na kayo ay makatarungan;
Oo, kayo lamang.
17 O Diyos, mula pagkabataʼy
itinuro nʼyo na sa akin
ang tungkol sa inyong
mga kahanga-hangang gawa
at hanggang ngayon,
inihahayag ko ito sa mga tao.
18 At ngayong akoʼy matanda na
at maputi na ang buhok,
huwag nʼyo akong pabayaan, O Diyos.
Maihayag ko sana ang inyong lakas
at kapangyarihan sa susunod na henerasyon,
at sa lahat ng mga darating sa hinaharap.
19 O Diyos, ang inyong katuwiran
ay hindi kayang maunawaan nang lubusan.
Kahanga-hanga ang inyong mga gawa.
Tunay ngang walang sinuman ang tulad ninyo.
20 Bagamaʼt pinaranas nʼyo ako
ng maraming hirap,
bibigyan nʼyo akong muli ng bagong buhay.
At mula sa aking pagkakalibing,
akoʼy muli nʼyong bubuhayin.
21 Bibigyan nʼyo ako
ng mas higit na karangalan,
at muli akong aaliwin.
22 O Diyos ko, dahil sa inyong katapatan
pupurihin ko kayo sa aking
pagtugtog ng alpa.
O Banal na Diyos ng Israel,
aawit ako ng mga papuri sa inyo sa pamamagitan ng pagtugtog ng lira.
23 Dahil akoʼy iniligtas nʼyo,
sisigaw ako sa tuwa habang tumutugtog
at umaawit ng papuri sa inyo.
24 Lagi kong ipapahayag na kayo ay matuwid
dahil nabigo at nalagay sa kahihiyan
ang mga nagnais na mapahamak ako.