Para sa direktor ng mga mang-aawit: Awit na isinulat ni Asaf na sinasaliwan ng instrumentong may kuwerdas81:0 instrumentong may kuwerdas Sa Hebreo, ito ay tinatawag na gittith..
1 Umawit kayo nang may galak
sa Diyos na nagbibigay sa atin
ng kalakasan.
Sumigaw kayo nang may tuwa
sa Diyos ni Jacob!
2 Umawit kayo at tugtugin
ang tamburin
kasabay ng magandang tunog
ng alpa at lira.81:2 lira: sinaunang instrumentong may kuwerdas.
3 Patunugin ninyo ang tambuli
tuwing Pista ng Bagong Buwan
na ating ipinagdiriwang
tuwing kabilugan ng buwan.
4 Dahil isa itong kautusan
para sa mga taga-Israel.
Itoʼy utos ng Diyos ni Jacob.
5 Ibinigay niya ang kautusang ito
sa lahi ni Jose
nang siyaʼy sumalakay
sa lupain ng Ehipto.
May narinig akong tinig
ngunit hindi ko kilala.
Sinabi niya,
6 "Kinuha ko ang mabigat niyang pasanin,
Pinalaya ko ang kanyang mga kamay sa dalahin.
7 Nang kayoʼy nahirapan,
tumawag kayo sa akin
at kayoʼy iniligtas ko.
Mula sa mga alapaap,
sinagot ko kayo at sinubok
doon sa bukal ng Meriba.
8 Mga Israelita, aking mamamayan,
pakinggan ninyo itong babala ko sa inyo.
Makinig kayo sa akin!
9 Wala kayong ibang magiging diyos kundi ako lang.
Huwag kayong sumamba
sa diyos-diyosan.
10 Ako ang Panginoon
na inyong Diyos.
Ako ang naglabas sa inyo
mula sa lupain ng Ehipto.
Humingi kayo sa akin
at ibibigay ko sa inyo
ang mga pangangailangan ninyo.
11 Ngunit kayong mga Israelita
na aking mga mamamayan,
hindi kayo nakinig at sumunod sa akin.
12 Kaya hinayaan ko kayo
sa katigasan ng inyong ulo81:12 ulo: O puso.
at ginawa ninyo ang inyong gusto.
13 Kung nakinig lang sana kayo sa akin
at sumunod sa aking mga pamamaraan,
14 kaagad ko sanang nilupig
at pinarusahan ang inyong mga kaaway.
15 Ang mga napopoot sa akin,
na Panginoon
ay yuyukod sa takot.
Ang kaparusahan nila
ay walang katapusan.
16 Ngunit kayo na aking mga mamamayan,
pakakainin ko kayo ng pinakamainam
na bunga ng trigo at pulot
hanggang sa mabusog kayo."