Salmos 19

Dura Buʼaa Faarfattootaatiif. Zabuurii Daawud.

1 Shamaayʼuniiwwan ulfina Allaaha odeessu;

bantiin shamaayʼuniis hojii harka isaa labsa.

2 Guyyaan tokko guyyaa kaanitti odeessa,

halkan tokkos halkan kaanitti beekumsa mulʼisa.

3 Haasaan yookaan dubbiin hin jiru;

sagaleen isaaniis hin dhagaʼamu.

4 Taʼus sagaleen isaanii lafa hundumaa,

dubbiin isaaniis handaara addunyaa gaʼe.

Inni shamaayʼuniiwwan keessatti biiftuudhaaf dunkaana dhaabe;

5 biiftuunis akkuma misirricha dinqa isaatii baʼuutii fi

akkuma moʼataa fiigicha dorgomutti gammadu tokkoo ti.

6 Isheenis handaara shamaayʼuniiwwanii tokkoo baatee

gara handaara kaaniitti naannofti;

wanni hoʼa ishee jalaa dhokatu tokko iyyuu hin jiru.

7 Seerri Rabbii Allaah mudaa hin qabu;

lubbuu namatti deebisa.

Ajajni Rabbii Allaah amanamaa dha;

nama wallaalaa beekaa godha.

8 Seerri Rabbii Allaah qajeelaa dha;

garaadhaaf gammachuu kenna.

Ajajni Rabbii Allaah qulqulluu dha;

ijaafis ifa kenna.

9 Rabbii Allaah sodaachuun qulqulluu dha;

bara baraan jiraata.

Murtiin Rabbii Allaah dhugaa dha;

walumaa galattis qajeelaa dha.

10 Inni warqee caalaa, warqee akka malee qulqulleeffame

caalaa iyyuu gatii qabeessa;

inni damma caalaa,

nadhii dammaa caalaa miʼaawaa dha.

11 Murtii kanaanis tajaajilaan kee ni gorfama;

isa eeguunis gatii guddaa qaba.

12 Eenyutu dogoggora isaa hubachuu dandaʼa?

Yakka koo isa dhokfamaa irraa na qulqulleessi.

13 Tajaajilaa kee cubbuu ija jabinaan hojjetamu irraa eegi;

cubbuun kunis na hin moʼatin.

Yoos ani hirʼina malee nan jiraadha;

dogoggora guddaa irraas qulqulluu nan taʼa.

14 Rabbii Allaah, Kattaa koo fi Furii ko,

dubbiin afaan kootii fi yaadni garaa koo

fuula kee duratti fudhatamaa haa taʼu.