1 A̱sulazuva,

nye i zuwai vi isawain ɗe alanga?

Nye i zuwai vu soko yi aciya̱wu

a mantsa ma na tsu ri pe a̱tsuma̱lima̱?

2 A̱za̱ e iwuya a̱ ta̱ 'ya̱susa̱n avangaci

o ɓongishi aza a na a̱ ri nu ucira shi.

Lyawa ifoɓi yi iwuya i le i ka̱mba̱ a aci e le.

3 A̱za̱ e iwuya a ta yuwusan uvaɗu

ni icigi yi iwuya yo okolo e le.

A̱za̱ a̱bunda̱ o utsa̱n

a̱ tsi isula ta̱ A̱sulazuva,

waru a tsu tara yi ili shi.

4 A̱za̱ e iwuya a̱ ta̱ na aciyogbamu,

ili i bura le na̱ A̱sula̱ shi.

A̱tsuma̱ a majiyan ma̱ le suru a tsu damma ta̱, <<A̱sula̱ lo shi.>>

5 A̱za̱ e iwuya a̱ tsu tsura̱ ta̱ ulyuwu we elime mantsa suru,

a̱ tsu reve nu uge'etosu wa̱ A̱sula̱ shi,

a̱ tsu ka̱lyuwusa̱ ta̱ n'yuwatan nle ne esu avama.

6 A̱tsuma̱ a majiyan ma̱ le a̱ tsu damma ta̱,

<<Tsa da'wan shi,

diga mantsa a̱ tyo mantsa

tsa uwa a̱tsuma̱lima̱ shi.>>

7 Una̱ u le tapu ɗa u ri na̱ wisulusa,

ne epen oɓolo ni ibili.✝

Elentsu e le a̱ ta̱ na

adanshi a avama ni iwuya.

8 A̱ tsu pa'an ta̱ a̱tsuma̱ a̱ mulyuci,

uvawun

o una aza a babu unusu.

A tsu zuwa ta̱ esu uba̱ta̱ wa aza a babu ucira.

9 A̱ tsu da̱na̱ ta̱ uvawun uba̱ta̱ u na a pa'ain tsa kamu.

A̱ tsu von ta̱ azama aza a na a̱ ri nu ucira shi.

Ni iyakuru i le a̱ tsu reme ta̱ aza a na a̱ ri nu ucira shi

a̱ ka̱ra̱ ne ele.

10 A̱ tsu dadasa ta̱ aza a na a̱ ri nu ucira shi reve a̱ lungusa̱ le,

o roco le ucira, reve a lyuwa aci e le.

11 A̱tsuma̱ a majiyan ma̱ le a tsu damma ta̱,

<<A̱sula̱ a dama shi!

U pala ta̱ esu a̱yi, we enishe shi!>>

12 'Yon A̱sulazuva!

Vu roco ucira wu ukere wa̱ wu, A̱sula̱!

She vi icina na aza a babu ucira wan!

13 Nye i zuwai a̱za̱ e iwuya o goroi A̱sula̱?

Nye i zuwai aa dansa okolo ele,

<<Wa̱a̱ ge'eto tsu shi>>?

14 Amma a̱vu A̱sula̱,

na amayun vu ta̱ e eneshe!

Ee, na amayun vu ta̱ a̱ ka̱lyuwusa̱ usa̱n na̱ a̱tsuma̱lima̱,

waru mantsa suru vu tu ufoɓu adama a na vaa kamba.

Ya̱'a̱ wu ɗa aza a na a̱ ri nu ucira shi aa zuwusa ucira u le,

a̱vu ɗa za na a kambusa mkpa'an.

15 Lyawa vu kuɗa ucira wa̱ a̱za̱ e iwuya

na ama a avama.

Vu ge'eto a̱za̱ e iwuya

hali she na̱ a̱ pa̱lu'wa̱ iwuya i le suru.

16 A̱sulazuva mogono ma ɗa hali hali!

Nɗa n na n 'yuwain a yuwaan yi a̱ga̱nda̱

o to kototo le diga e iɗa'a.

17 A̱sulazuva,

uwwa mesun ma aza a na a̱ ri nu ucira shi,

vu uwwa le

vu ca le okolo o ugbamu.

18 Vu ta yuwan uge'etosu u mejege

adama a mkpa'an na aza a na e le'ei

tsa̱ra̱ ama

a̱ da̱shi ca le wovon wan.