1 Cine meshon ma̱ tsu da̱na̱

a maluwa ma mini mo uta̱nu o uɗolu,

ne ɗa wuma u va̱ u ri

a maluwa ma̱ wu

A̱sula̱ a̱ va̱.

2 A̱sula̱ n ta uwwusa akuli a̱ wu,

A̱sula̱ a wuma.

Urana une u ɗa ma̱a̱ ta̱wa̱

n yuwan a̱ga̱nda̱ a̱ ma̱ka̱ka̱n ma̱ wu?

3 Ayin nu urana n ta̱ a̱ mesun,

aɓara a̱ va̱ a ɗa ilyalya i va̱,

mantsa suru n'yuwatan n va̱

a ta a dansaa mu,

<<Te ɗa A̱sula̱ a̱ wu?>>

4 Mantsa ma na n cuwain ili i na i ka̱ra̱i,

reve okolo a̱ va̱ a̱ la̱ngwa̱,

cine n tsu wala na ama,

a̱ tyo o u'wa wa̱ A̱sula̱.

Oɓolo ama a̱ ma̱za̱nga̱,

e ishipa a̱ 'ya̱susa̱n uɗyo

a yuwusaan A̱sula̱ ica.

5 Adama a̱ nye okolo a̱ va̱ a̱ la̱nga̱i?

Adama a̱ nye mo o'woi a̱tsumola̱ngu tsunda?

N ta zuwa okolo a̱ va̱ uba̱ta̱ wa̱ A̱sula̱,

n ta cuwisa yi,

za vi iwawi i va̱ na̱ A̱sula̱ a̱ va̱.

6 Okolo a̱ va̱ a̱ la̱ngwa̱ ta̱ lon.

Adama o ndolo n ta cuwan na̱ a̱vu

o upasu wi iɗa ya Yahuda,

na aagaɗi a Hamon,

na aagaɗi a Miza.

7 A̱tsuma̱lima̱ a̱ va̱ a̱ ta̱ tsa̱ mini ma̱ a̱ru'un,

o ɓolotosu aciyele tsa̱ra̱ a̱ pura̱ a̱mu,

ikeɗu i mini ma̱ wu waru,

a la'a ta̱ ucira u va̱.

8 A̱sulazuva o roco mu ta̱,

icigi ya̱ yi i na i tsu vadala shi urana suru,

na ayin n ta yuwayin ica,

n yuwan avasa uba̱ta̱ wa̱ A̱sula̱

a na a ca numu wuma.

9 N damma ta̱ A̱sula̱, aatali o upa'atan u va̱,

<<Cine vi icinai na̱ a̱mu?

Nye i zuwai mo sowuso a̱tsuma̱lima̱,

adama o ule'e wu n'yuwatan n va̱?>>

10 Adanshi a n'yuwatan n va̱ a sapa mu ta̱,

tsa matsun me pe'eni e etele a̱ va̱,

na a tsu dansa mu,

<<Te ɗa A̱sula̱ a̱ wu?>>

11 Nye i ta̱wa̱a̱ numu na̱ okolo ula̱ngu?

Nye i ta̱wa̱a̱ numu na̱ a̱tsumola̱ngu?

N ta zuwa okolo a̱ va̱ uba̱ta̱ wa̱ A̱sula̱,

n ta cuwisa yi,

za vi iwawi i va̱ na̱ A̱sula̱ a̱ va̱.