1 Godyoyi A̱sulazuva,

adama a na a̱yi za vi isa'ani ɗa,

icigi ya̱ yi i na i tsu vadala shi i ta̱ lo hali hali.

2 Lyawa aza Isra'ila a damma,

<<Icigi ya̱ yi i na i tsu vadala shi i ta̱ lo hali hali!>>

3 Lyawa u'wa wa Haruna u damma,

<<Icigi ya̱ yi i na i tsu vadala shi i ta̱ lo hali hali!>>

4 Lyawa aza a na a uwwusa

wovon wa̱ A̱sulazuva a damma,

<<Icigi ya̱ yi i na i tsu vadala shi i ta̱ lo hali hali!>>

5 A̱tsuma̱ addama a̱ va̱,

n ɗe ta̱ A̱sulazuva,

A̱sulazuva waru a̱ usu mu ta̱,

a̱vu u wawa mu.

6 A̱sulazuva o to oɓolo na̱ a̱mu,

maa uwwa wovon shi.

Nye i ɗa vuma

aa gura yuwan na̱ a̱mu?

7 A̱sulazuva o to oɓolo na̱ a̱mu,

a̱ yi ɗa ikambishi i va̱.

N ta̱ ene a̱risa̱

a n'yuwatan n va̱.

8 U la'a ta̱ a zami upa'atan,

uba̱ta̱ wa̱ A̱sulazuva,

a na a zuwaa vuma ucira.

9 U la'a ta̱ a zami upa'atan,

uba̱ta̱ wa̱ A̱sulazuva,

a na a zuwaa azagbain a ama ucira.

10 Nɗa suru a̱ ka̱nda̱ruwa̱ mu ta̱,

agba n kototo le ta̱ a ala A̱sulazuva!

11 A̱ ka̱nda̱ruwa̱ mu ta̱ mɓa̱nga̱ suru,

agba n kototo le ta̱ a ala A̱sulazuva!

12 A̱ ka̱nda̱ruwa̱ mu ta̱ tsi ishiki,

amma a̱vu a̱ kula̱ babu usa̱n

tsa akina a awanda,

amma n kototo le ta̱

a ala A̱sulazuva!

13 A̱ riya̱a̱ mu ta̱ nu ucira,

hali n yuwan n ga shi n ta̱ riya̱,

amma A̱sulazuva a kamba mu ta̱.

14 A̱sulazuva a ɗa ucira u va̱

ni ishipa i va̱,

a̱yi ɗa wo o'woi iwawi i va̱.

15 Yisali i ma̱za̱nga̱

nu ulyuwu wa aci

a̱ ta̱ 'yosun,

o ogodo a̱za̱ a̱ a̱ɓula̱ adansa,

<<Ukere wa̱ a̱ A̱sulazuva,

u yuwan ta̱ a̱ba̱jini e ili!

16 Ukere wa̱ a̱ A̱sulazuva,

u ca ta̱ ulyuwu wa aci,

ukere wa̱ a̱ A̱sulazuva,

u yuwan ta̱ a̱ba̱jini e ili!>>

17 Ma̱a̱ kuwa̱ shi,

amma n ta̱ da̱na̱ wuma,

n cuɗuwa linga va̱ A̱sulazuva.

18 A̱sulazuva a ca mu ta̱ oforo lon,

amma u lyawa mu n kuwa̱ shi.

19 Kpa̱tu'wa̱a̱ mu

na̱ntsu va̱ a̱ɓula̱,

a̱vu n uwa

n godyowo A̱sulazuva.

20 Nda una̱ntsu wa̱ A̱sulazuva,

uba̱ta̱ u na a̱za̱ a̱ a̱ɓula̱

a ɗa goon a uwa pe.

21 N to godyo wu

adama a na vu usu mu ta̱,

waru vo o'wo ta̱ iwawi i va̱.

22 Aatali a na asuwi a 'yuwain,

a̱yi ɗa wo o'woi ikyun yu ucira a̱tsuma̱ o usaa.

23 Ulinga wa̱ A̱sulazuva a ɗa nda,

ili ya asalama i ɗa esu a̱ tsu.

24 A̱yi nda ɗa urana u na

A̱sulazuva a yuwain,

tsu yuwain ma̱za̱nga̱

na̱ mere a̱tsuma̱ a̱ yi!

25 A̱sulazuva, wawa tsu!

A̱sulazuva, ca tsu ulyuwu wa aci.

26 Za va aba'un ɗa,

za na ta̱wa̱i na ala a̱ A̱sulazuva!

Tsu zuwaa ɗu ta̱ aba'un,

diga o u'wa wa̱ A̱sulazuva.

27 A̱sulazuva A̱sula̱ a ɗa,

u zuwa ta̱ ekan e ikana a aci a̱tsu,

tara yi kucci ɗu va̱ a̱buki,

i zuwa le avana a masa'a.

28 A̱vu ɗa A̱sula̱ a̱ va̱,

n to godyo wu,

a̱vu ɗa A̱sula̱ a̱ va̱,

n ta ca wu tsugbain.

29 Godyoyi A̱sulazuva,

adama a na a̱yi za vi isa'ani ɗa,

adama a na icigi ya̱ yi i na i tsu vadala shi

i ta̱ lo hali hali!