1 I cuwa A̱sulazuva!

I godyo A̱sulazuva,

adama e isa'ani ya̱ yi,

adama a na icigi ya̱ yi i na i tsu vadala shi

i ta̱ lo hali hali.

2 Zane ɗa a gura damma

linga gbagbain va̱ A̱sulazuva,

ko u gura cuwa yi?

3 A̱za̱ a̱ ma̱za̱nga̱ a ɗa

aza a na e isawaan yi a amayun,

aza a na a yuwusan mejege mantsa suru.

4 A̱sulazuva, vu cuwan na̱ a̱mu

na̱ vu roco isa'ani a̱ tyo uba̱ta̱ wa ama a̱ wu,

vu kamba mu A̱sulazuva

na̱ vu wawa le,

5 tsa̱ra̱ mu uwwa uyo'o wu ulyuwu wa aci

wa aza a na vu ɗangwai,

n yuwan ma̱za̱nga̱

oɓolo na ama a̱ wu,

reve n uwa a̱ a̱tsuma̱

a agadu a̱ wu ni ica.

6 Tsu yuwan ta̱ unusu

cine nkaya n tsu n yuwain,

tsu yuwan ta̱ ili i babu ulobonu,

reve tsu yuwan iwuya.

7 Ana nkaya ntsu n da̱na̱i a Masar,

a̱ ka̱mbuwa̱ ugbozu e ili ya asalama a̱ wu shi.

Waru a cuwan,

ni icigi ya̱ wu i na i tsu vadala shi.

Reve a̱ 'ya̱sa̱a̱n wu aci,

zuzu na̱ Mala ma̱ Shili.

8 Na̱ ne suru u wawa le ta̱

adama a ala a̱ yi,

tsa̱ra̱ u revetyo

a̱a̱ba̱jini ucira wa̱ yi.

9 U ɓara ta̱ Mala ma̱ Shili,

reve u 'yewe,

reve u pasato le a mala

cine vu revei iɗa yu u'yewu.

10 U wawa le ta̱

e ekere a n'yuwatan,

diga e ekere a n'yuwatan n ɗa

u wawa nle.

11 Reve mini ma lyuwa n'yuwatan n le,

ko vuma ta̱ la'a shi.

12 Ɗaɗa a̱ usuyi nzuwulai ma̱ yi,

reve a canaa yi ishipa yi ica.

13 A jima shi

ɗaɗa e icinai na̱ linga va̱ yi,

waru o puro a̱sa̱la̱ a̱ yi shi.

14 Reve utsa̱n u tsura̱ le a̱ a̱tsumona,

ɗaɗa gba a̱ lyungwa̱i A̱sula̱ uba̱ta̱'a̱.

15 Ɗaɗa u ca nle

ili i na a patiyi,

amma a̱vu u lyunguwa̱a̱ le

na̱ mɓa̱la̱ n wuya.

16 A̱vu a uwa tsushu'un na̱ Musa o uva̱la̱ta̱,

oɓolo na̱ Haruna za na a̱ A̱sulazuva a tawai.

17 Reve iɗa i kpa̱tu'wa̱ una̱ u soɗu Datan,

reve u ciɗo oɓolo a ama a Abiram.

18 Reve waru akina a̱ cipa̱ a̱ kula̱to

aza a na a̱ da̱na̱i oɓolo ne le,

a̱vu u kula̱to a̱za̱ e iwuya o ndolo.

19 A yuwan ta̱ iroci

i ma̱dindim ɗe Horeb,

reve a yuwaan a̱ma̱li

a na a̱ zuɗa̱i a̱ga̱nda̱.

20 A vadala ta̱ tsugbain tsa̱ A̱sula̱

a̱ tyo o ogono a nan na a rumai,

na tsu tama anlya.

21 E icina ta̱ na̱ A̱sula̱

a na a wawa nle,

za na yuwain a̱ba̱jini a̱ba̱jini e ili

a̱tsuma̱ a Masar,

22 ili ya asalama e iɗa ya Ham

reve waru u yuwan ili i wovon

o una̱ u Mala ma̱ Shili.

23 Ɗaɗa u dammai u to kototo le,

ana Musa za na A̱sula̱ a ɗangwai

e isawaan nle e memere

ɗaɗa u bula̱i upan u na woo kototo le.

24 Reve a 'yuwan iɗa i sa'ani'i,

agba a̱ usu nzuwulai ma̱ yi shi.

25 A̱vu fo a yuwan adanshi

a awuya o ogodo e le,

waru a yuwan tsutoni na̱ A̱sulazuva shi.

26 Ɗaɗa gba u 'ya̱sa̱in ukere wa̱ yi

a̱vu u kucinaa le,

ana u ta zuwa le,

a̱ kuwa̱ a̱tsumona.

27 Waru u ta bete'we le

a nɗa n na n ri a̱za̱ le shi,

a̱vu u zuwa gundo le

kuwa̱ a̱tsuma̱ a nɗa.

28 A̱vu o oɓolo aci e teme a yuwusaan

Ba'al va Peyo a̱ga̱nda̱,

reve a lyuwa kucci

na a cayi musula̱.

29 A̱vu a zuwa A̱sulazuva a yuwan upan

adama e iwuya i na a yuwain,

reve mɓa̱la̱ n uwa a̱tsuma̱ e le.

30 Agba Finiha 'yon ta̱

wi isawan mishin,

avu mɓa̱la̱'a̱ n koto.

31 Adama o ndolo a ɗa

aa cuwusan na̱ a̱ɓula̱ yi

diga mantsa a̱ tyo a mantsa hali hali.

32 A zuwa ta̱ A̱sulazuva a yuwan upan

o uɗolu wa Meriba,

reve addama

a cina Musa adama e le,

33 adama a na a̱ 'ya̱sa̱a̱n ta̱

Ruhu va̱ A̱sula̱ a aci,

reve adanshi a babu uyo'o

o uta̱ o una̱ wa Musa.

34 O kototo nɗa'a

cine A̱sulazuva a damma nle shi,

35 amma a yuwan ta̱

muwwulai na̱ nɗa,

reve waru a tara agadu e le.

36 A yuwaan ta̱ a̱ma̱li a nɗa'a a̱ga̱nda̱,

a̱vu wo o'wo le maza.

37 A ca ta̱ olobo ne esheli le kucci

uba̱ta̱ u musula̱ mu nɗa'a.

38 O oco ta̱ mpasa m babu unusu,

mpasa mo olobo e le ne esheli e le,

za na a cayi kucci

uba̱ta̱ wa̱ a̱ma̱li wa aza a Ka'ana,

waru a̱ lungusa̱ ta̱ iɗa'a na̱ mpasa n le.

39 A̱ lungusa̱ ta̱ aciyele

a̱tsuma̱ e ili i na a yuwusan,

linga le vo o'wo ta̱

tsushakala e ekere e le.

40 Reve A̱sulazuva a yuwan

upan na ama a̱ yi

a̱vu o o'wo ili yi idaba

e ekere a̱ yi.

41 A̱vu u ca le e ekere a nɗa,

a̱vu n'yuwatan n le

n yuwan tsugbain a aci e le.

42 A̱vu n'yuwatan n le n ɓongi le

reve a zuwa le za̱la̱ vu ucira u le.

43 U tsu wawa le ta̱ mantsa na̱ a̱bunda̱,

amma a la'a ta̱ ciga a̱ 'ya̱sa̱sa̱n aci,

a̱vu a ca le oforo adama o unusu u le.

44 Na̱ ne suru u tsee ene ta̱ atakaci e le

mantsa ma na wu uwwai mesun me le,

45 a̱vu u cuwan na akucunu a̱ yi ne le,

waru a̱tsuma̱ e icigi ya̱ yi i na i tsu vadala shi

u tsa̱ e ene ta̱ iliyali i le.

46 U zuwa ta̱ aza a na

a̱ guza̱ nle tsa agbashi,

e ene iliyali i le.

47 A̱sulazuva A̱sula̱ a̱ tsu,

wawa tsu,

reve vu ɓoloto tsu diga a nɗa,

tsa̱ra̱ tsu godyoo ala a akiza a̱ wu

waru tsu yuwaan wu ica.

48 Tsu yuwayin A̱sulazuva ica,

A̱sula̱ aza a Isra'ila,

diga gogo a̱ tyo hali hali.

Lyawa ama suru a damma, <<Ami!>>

Cuwai A̱sulazuva!