1 Vu ka̱lyuwa̱ mu A̱sula̱,

adama a na a̱vu ɗa upa'atan u va̱.

2 N damma ta̱ A̱sulazuva,

<<A̱vu ɗa A̱sulazuva a̱ va̱,

n ri ni ili i sa'ani i ro shi she a̱vu a̱ nde'en.>>

3 Aza a na a̱ ri na akiza a̱tsuma̱ e iɗa'a

ele ɗa a̱ ri na̱ tsugbain!

Ele ɗa aza a na a zuwusa mu ma̱za̱nga̱.

4 Aza a na a ɗangulai,

o toni musula̱ n ro,

a̱ ta̱ da̱shishi aciyele a̱tsuma̱lima̱ lon.

Moo ɓolo aci ne le,

uba̱ta̱ wu ucasu u kucci ne le shi,

me ɗe aala a̱ musula̱ nle shi.

5 A̱sulazuva,

a̱vu ɗa goon n ri na̱ yi,

a̱vu ɗa va yuwusaan mu ili i na n cigai biti.

Wuma u va̱ u ta̱ e ekere a̱ wu.

6 Akunda a na a ca numu

u tu ulobonu lon.

Ili i ro yi lo shi n ta̱ na agadu a sa'ani.

7 N ta cuwa A̱sulazuva za na a casu mu a̱sa̱la̱,

ko na ayin okolo a̱ va̱ a ta casu mu adanshi.

8 Mantsa suru n reve ta̱ A̱sulazuva o to oɓolo na̱ mu,✝

adama a na u ta̱ zuzu na̱ mu,

babu ili i na ya da'waton mu.

9 Adama o ndolo tapu ɗa n ri na̱ ma̱za̱nga̱ na̱ mere,

mantsa suru n ta uwwusa gbaga ɗa n ri.

10 Adama a na va lyawa wuma u va̱,

a̱tsuma̱ aason shi,

ko vu lyawa macigata ma̱ wu ma shama shi.✝

11 Vu roco mu ta̱ ure,

u wuma,

na̱ vu ri lo uba̱ta̱ u va̱,

n tsu shiwan ta̱ na̱ ma̱za̱nga̱ lon,

nden o ukere usa'ani wa̱ wu,

mawwa mo uyo'o u ɗa hali hali.