1 A̱sulazuva, a̱vu ɗa A̱sula̱

a na a tsu ca oforo,

vu roco upan wa̱ wu.

2 'Yon, a̱vu za na vee ge'eto uvaɗi,

vu tsupaa aza a na a yuwusan aciyogbamu,

ili i na yi ntsaayi!

3 A̱sulazuva, hali mantsa ma ne ma ɗa?

Hali mantsa ma ne ɗa,

a̱za̱ e iwuya a̱a̱ da̱na̱ a̱ ma̱za̱nga̱?

4 Hali mantsa ma ne a̱a̱ da̱na̱

a yuwusan adanshi a afalu,

a lapusa ma̱ka̱ka̱n suru

adama mayan me iwuya?

5 A̱sulazuva, a̱ ta̱ rukutsusa̱ ama a̱ wu,

o to ɓongishi ama a agadu a̱ wu.

6 A̱ ta̱ o unusa nruna̱ no omocin,

waru o unusa mkpa'an.

7 Ata dansa,

<<A̱sulazuva e eneshe tsu shi,

A̱sula̱ a Yakubu u dama shi.>>

8 I ka̱mbuwa̱ ugbozu,

a̱ɗu a̱za̱ o ulambu

u majiyan a̱tsuma̱ a ama,

a̱ɗu olo, mantsa ma̱ ne ma ɗa

yaa yuwan ugbozu?

9 A̱yi na u yuwain atsuvu,

waa uwwusa shi?

A̱yi na u yuwain esu

we eneshe shi?

10 Za na tsu ɓara nɗa,

waa ca oforo shi?

Za na tsu rito vuma,

u ri nu urevu shi?

11 A̱sulazuva e reve ta̱ majiyan ma vuma,✝

u reve ta̱ a na majiyan me le pere ɗa.

12 A̱sulazuva, za ma̱za̱nga̱ ɗa,

za na vu ronoi atsuvu,

vuma na vu ritoyi diga,

a̱ wila̱ wa̱ wu,

13 za na vu ca yi wivuwun,

a rana va̱ a̱tsuma̱lima̱.

Hali urana u na a̱a̱ ka̱pa̱a̱

a̱za̱ e iwuya aason.

14 Adama a na A̱sulazuva,

aa vari ama a̱yi shi,

waa 'yuwan agadu a̱ yi shi.

15 Amayun a̱ ta̱ ka̱mba̱

uba̱ta̱ wa̱ a̱za̱ o uge'etosu,

aza a amayun o okolo

a ta yuwan ma̱za̱nga̱.

16 Zane ɗa a̱ 'yon wi isawaan mu,

e ekere aza a iwuya?

Zane ɗa e isawaan mu,

a aci aza na a yuwusan iwuya?

17 Na̱ shi A̱sulazuva a ɗa

a̱ da̱na̱i ikambishi i va̱ shi,

wuma u va̱ u shi ta̱ a̱ ka̱ra̱

a̱ tyo uba̱ta̱ wa̱ a̱kwa̱kwa̱.

18 A̱sulazuva, ana n dammai,

<<Ana a̱ va̱ a̱ ta̱ dereceshe,>>

icigi ya̱ wu i na i tsu vadala shi

i guza̱ mu ta̱.

19 Ana majiyan ma yuwan numu a̱bunda̱,

ucawu wa adanshi a̱ wu,

a ca mu ta̱ asuvu nden.

20 Vu ta gura ɓolo aci na̱ azagbain e iwuya,

aza a na a̱ ka̱mbuwa̱i ulambu wa amayun

wo oꞌwo amayun e le?

21 A̱ tso ɓoloo ta̱

a̱za̱ a̱ a̱ɓula̱ aci,

a̱vu a paɗaa aza a babu unusu

ugana wu ukwisa̱.

22 Amma A̱sulazuva a ɗa

upa'atan wu ucira u va̱,

A̱sula̱ a̱ va̱ a̱ yi ɗa

aatali o upa'atan u va̱.

23 U ta̱ ge'eto le

adama a̱ nusu le,

reve u kototo le

adama e iwuya i le,

A̱sulazuva, A̱sula̱ a̱ tsu o to kototo le.