1 A̱sulazuva ya̱'a̱ wu ɗa n tsura̱i

uba̱ta̱ wu upa'atan wu ucira.

She vu lyawa mu,

mu uwwa wono wan ko ke'en.

2 Vu wawa mu,

a̱vu vu kamba mu a̱tsuma̱ a̱ a̱ɓula̱ a̱ wu.

Vu zuwaa mu atsuvu,

a̱vu vu papa mu.

3 Vo o'wo mu aatali o upa'atan wu ucira,

uba̱ta̱ u na ma̱a̱ da̱na̱ a̱a̱ 'ya̱wusa̱ kuci.

Vu ca udammu a wawa mu,

adama a na a̱vu ɗa aatali a̱ va̱,

nu ukari wu ucira u va̱.

4 A̱sula̱ a̱ va̱, wawa mu, e ekere a̱za̱ e iwuya,

no o ucira wa ama a vama

aza a na e tse ene iliyali shi.

5 A̱sulazuva Zagbain, ya̱'a̱ wu ɗa n zuwai okolo.

Ya̱'a̱ wu ɗa maa zuwusa ucira

diga a̱mu o tsulolobo.

6 Diga a mantsa ma na a matsan numu,

n zuwa ta̱ ucira u va̱ ya̱'a̱ wu.

Vu zuwa ta̱ a matsan mu,

a̱vu ɗa maa yuwaan ica mantsa suru.

7 Mo o'wo ta̱ iroci e ekere ama a̱bunda̱,

amma a̱vu ɗa uba̱ta̱ wu upa'atan wu ucira u va̱.

8 Una̱ u va̱ u shiwan ta̱ ni ica ya̱ wu,

aa yuwusan adanshi a tsugbain tsa̱ wu urana suru.

9 She vu vari mu a mantsa ma na n kutsai wan,

she vu kasa na̱ mu a mantsa ma na ucira u va̱ u kotoi wan.

10 Adama a na n'yuwatan n va̱

n yuwan ta̱ adanshi a aci a̱ va̱,

aza a na a pura o una mu o ɓolo ta̱ aci.

11 A dansa, <<A̱sula̱ a vari yi ta̱,

tsu saɓa niyi, tsu reme niyi.

Adama a na za lo na a wawa yi shi.>>

12 A̱sula̱, she vu yuwan alanga na̱ mu wan.

A̱sula̱ a̱ va̱, jika̱ vu kamba mu!

13 Lyawa aza a na aa yuwusan adanshi e epen a aci a̱ va̱

a̱ kuwa̱ na̱ wono.

Lyawa aza a na a cigai a amaton mu,

a uwwa wono waru o rono le e iɗa.

14 Agba a̱mu n ta̱ zuwa okolo a̱ va̱ ya̱'a̱ wu kuci,

n ta̱ da̱na̱ a yuwusaan wu ica babu ukotu.

15 N ta damma za suru, adama a̱ a̱ɓula̱ a̱ wu,

ni iwawi ya̱ wu urana suru,

ko na wo o'woi n reve a̱bunda̱ e le shi.

16 A̱sulazuva Zagbain, n ta̱ ta̱wa̱ n damma

linga gbagbain va̱ wu,

n ta damma a̱ɓula̱ a wu,

za va̱ wu goon.

17 A̱sula̱, a̱vu ɗa vu rito numu

diga a̱mu o tsulolobo,

waru hali a̱ tyo ana'an n ta yuwusan adanshi

a linga va asalama a̱ wu.

18 A̱sula̱, ko na̱ n shi n kutsa na̱ yono,

she vu vari mu wan,

hali she na̱ n damma

mantsa ma na ma̱ ta̱wa̱ a ɗa a linga gbagbain va̱ wu

nu ucira wa̱ wu e ekere aza a na a̱ ri lo a̱ ta̱wa̱.

19 A̱sula̱, a̱ɓula̱ a̱ wu a rawa ta̱ zuva,

a̱vu na vu yuwain linga gbagbain.

Zane ɗa ri tsa̱ wu?

20 Ko na wo o'woi vu zuwa me enei

addama na̱ meleshe ma̱ a̱bunda̱,

vu ta̱ ka̱mbuwa̱a̱ mu na̱ wuma u va̱,

vaa lyawa mu n kuwa̱ shi.

21 Vu ta̱ da̱shi mu tsugbain,

a̱vu vu cayisa mu asuvu nden.

22 A̱sula̱ a̱ va̱, n ta cuwa wu

ni igaraya, adama a amayun a̱ wu.

N ta canaa wu ishipa yi ica ni ikumburu,

a̱vu Za va Akiza a Isra'ila.

23 N ta̱ 'ya̱sa̱n uɗyo u yisaali i ma̱za̱nga̱

a mantsa ma na ma yuwusaan wu ishipa yi ica,

adama a na vu wawa numu.

24 N ta yuwan adanshi a linga va̱ a̱ɓula̱ a̱ wu urana suru,

adama a na aza a na a zama na amaton mu

a uwwa ta̱ wono reve a uwwa lipu.