1 Uba̱ta̱ wa̱ A̱sula̱ a ɗa goon

wuma u va̱ wa̱ tsura̱ wivuwun,

iwawi i va̱ i ta̱ o uta̱sa̱ uba̱ta̱ wa̱ yi.

2 A̱sula̱ a ɗa goon aatali a̱ va̱

ni iwawi i va̱,

uba̱ta̱ wu upa'atan wu ucira u va̱,

babu ili i na ya̱a̱ jinga̱ɗa̱ mu.

3 Hali mantsa ma̱ ne ma ɗa

a̱ɗu n'yuwatan yaa yuwan nla̱ngi na̱ vuma ta̱?

Hali mantsa ma̱ ne i cigai yu una,

za na ri nu ucira shi

tsu ukari u na u cigai wo oco?

4 O foɓo ta̱ lon tsa̱ra̱ a̱ mula̱ yi

diga uba̱ta̱ u tsugbain tsa̱ yi.

A ta uwwusa uyo'o we epen,

a tsu zuwaa ta̱ za aba'un nu una̱ u le,

amma o okolo e le una̱ u ɗa a yuwusan. Wivuwun

5 Okolo a̱ va̱ vu zami wivuwun goon uba̱ta̱ wa̱ A̱sula̱,

adama a na a̱ yi ɗa goon waa casu mu ukadu.

6 A̱sula̱ a ɗa goon aatali a̱ va̱

ni iwawi i va̱,

uba̱ta̱ wu upa'atan wu ucira u va̱,

babu ili i na ya̱a̱ jinga̱ɗa̱ mu.

7 Iwawi i va̱ na̱ tsugbain tsa̱ va̱

a̱ ta̱ uba̱ta̱ wa̱ A̱sula̱ goon,

A̱yi ɗa aatali o ucira a̱ va̱,

nu upa'atan u va̱.

8 A̱ɗu ama i ca A̱sula̱

okolo a̱ɗu mantsa suru.

I damma yi okolo a̱ ɗu,

adama a na a̱yi ɗa upa'atan u tsu.Wivuwun

9 Ozo o ulambu a̱ ta̱ tsu upepu u wivuwun,

a̱za̱ o utsuru fo a̱ ri nu urana shi.

Ko shi no o rito le

ni ili yu uritosu wu ume,

a̱ ri nu ume wi ili i ro shi,

suru nle a la'a ta̱ upepu venwun.

10 She i zuwa okolo a̱ɗu

o ulinga u yipalishi wan,

ko i zuwa okolo uba̱ta̱ wi iliyinkapa wi ili i wivu wan.

Ko na̱ shi utsuru u ɗu u da̱shi,

she i zuwaa yi ucira wan.

11 Uta̱ u ɗa A̱sula̱ a yuwain adanshi,

ili ire i ɗa mu uwwai, ana,

<<Ucira za va̱ A̱sula̱ a ɗa,

12 waru a̱vu A̱sulazuva icigi i na i tsu vadala ɗa shi.✝

Na amayun vu ta tsupaa za suru

o una̱ wi ili i na u yuwain.>>