1 I cuwa A̱sulazuva a̱ɗu musula̱,

i cuwa tsugbain tsa̱ yi nu ucira wa̱ yi.

2 I cuwa tsugbain tsa ala a̱ A̱sulazuva,

i kingyo elime a̱ A̱sulazuva,

adama a tsugbain tsa akiza a̱ yi.

3 A uwwa ta̱ uɗyo wa̱ A̱sulazuva zuva mala,

A̱sula̱ za Tsugbain yuwan ta̱ tsata.

Tsata'an u usu ta̱ nu ucira zuva mala.

4 Uɗyo wa̱ A̱sulazuva,

u ta̱ nu ucira.

Uɗyo wa̱ yi,

u ta̱ tapu na̱ tsugbain.

5 Uɗyo wa̱ A̱sulazuva,

u ta a kuɗusa ɗanga sida,*

u ta a kuɗusa ɗanga gbagbain va Lebanon.

6 U ta zuwusa nsasan ma̱ Lebanon,

tsu'yan tsa ma̱dindim,

masasan ma Hamon waru tsu'yan

tsa mawun ma yanci.

7 Uɗyo wa̱ A̱sulazuva,

u tsu zuwa ta̱ imaɗatsu i ca ekan.

8 Uɗyo wa̱ A̱sulazuva,

u tsu zuwa ta̱ a̱tsumona a̱ jinga̱ɗa̱.

Uɗyo wa̱ A̱sulazuva,

u tsu zuwa ta̱ a̱tsumona a Kedesh a̱ jinga̱ɗa̱.

9 Uɗyo wa̱ A̱sulazuva,

u tsu zuwa ta̱ ɗanga seda a̱ jinga̱ɗa̱,

u tsu zuwa ta̱ ɗanga va̱ a̱rumbu o oco a̱vu'un.

A̱tsuma̱ a̱ A̱a̱'isamapaɗa a̱ yi

vuma suru tsu 'ya̱sa̱n ta̱

uɗyo wa̱ yi adansa,

<<Tsugbain za va̱ A̱sula̱ ɗa!>>

10 A̱sulazuva a ta yuwusan,

tsugono zuva mini ma gbain,

A̱sulazuva a ta yuwusan tsugono,

tsa̱ mogono hali hali.

11 Lyawa a̱ A̱sulazuva a ca ama a̱ yi ucira!

Lyawa a̱ A̱sulazuva a ca ama a̱ yi asuvu nden.