1 A̱sulazuva n ta cana ishipa

adama e icigi ya̱ wu i na i tsu vadala shi kuci,

nu una̱ u va̱ u ɗa maa damma a ɗa a amayun a̱ wu,

a̱ tyo mantsa suru.

2 N ta damma a na icigi ya̱ wu i na i tsu vadala shi

i ta̱ lo hali hali,

adansa vu shuwa̱ ta̱ amayun a̱ wu ɗe zuva.

3 Vu damma ta̱,

<<N yuwan ta̱ nzuwulai na̱ za na n ɗangwai,

n kucinaa ta̱ Da̱wuda aagbashi a̱ va̱,

4 adansa, <N ta̱ shuwa̱ ugundo wa̱ wu hali hali,

waru n zuwa ugundo wa̱ wu u yuwan tsugono,

diga a mantsa a̱ tyo mantsa.✝> >> Wivuwun

5 A̱sulazuva, lyawa zuva cuwa linga va asalama a̱ wu,

na amayun a̱ wu a̱tsuma̱ e iɓolo ya aza a akiza ɗe zuva.

6 A̱sulazuva, zane ɗa ɗe zuva na a kurato na̱ a̱vu?

Zane ɗa ri tsa̱ wu, a̱tsuma̱ a̱ musula̱?

7 A̱tsuma̱ e iɓolo ya aza a akiza ɗe zuva,

a̱vu ɗa a la'a uwwai wovon,

a̱vu ɗa vu la'ai ili i wovon a̱tsuma̱ aza a na a̱ ri

uka̱nda̱ruwu na̱ a̱vu suru.

8 A̱sulazuva A̱sula̱ o oɓolo a̱ a̱soja a zuva,

zane ɗa ri tsa̱ wu?

A̱sulazuva, a̱vu za vu ucira ɗa

waru amayun a̱ wu a̱ tu uka̱nda̱ruwu na̱ a̱vu.

9 Vu ta yuwusan tsugbain tsa mala mo ujaru.

Mantsa ma na ikeɗu ya̱ yi i 'yon yi, vu tsu voton le ta̱.

10 Vu rukutsa̱ ta̱ Rahapu* tsa a aza a na o unai.

Nu ukere wu ucira wa̱ wu u ɗa,

vu bete'wei n'yuwatan ma̱ wu.

11 Zuva za va̱ wu ɗa, oɓolo nu uvaɗi.

Vu shuwa̱ ta̱ uvaɗi,

oɓolo ni ili i na i ri pe a̱tsuma̱ a̱ yi.

12 A̱vu ɗa vu yuwain ugana nu uyagi.

Masasan ma Tabo na̱ Hamon,

a ta canasa ishipa ya aala a̱ wu adama a̱ ma̱za̱nga̱.

13 Ukere wa̱ wu u ta̱ nu ucira,

ukere wa̱ wu u ta̱ nu ukadu,

ukere wa̱ wu u tsura̱ ta̱ tsugbain.

14 A̱ɓula̱ nu uge'etosu wa amayun,

ele ɗa ikyun i tsugono tsa̱ wu.

Icigi i na i tsu vadala shi na amayun

ele ɗa a̱ ri elime a̱ wu.

15 A̱sulazuva, a̱za̱ a̱ ma̱za̱nga̱ a ɗa aza a na

a yuwusaan wu a̱ga̱nda̱ a canasa ishipa,

aza a na a̱ ri a mmalu e ekan

a na a̱ ri elime a̱ wu!

16 A ta yuwusan ma̱za̱nga̱ na ala a̱ wu urana ma̱ɓula̱,

adama a̱ a̱ɓula̱ a̱ wu a̱ ta̱ tsura̱sa̱ tsugbain.

17 A̱vu ɗa vu tsu ca le tsugbain nu ucira,

waru a̱tsuma̱ e isa'ani ya̱ wu vu ca le ta̱ ulyuwu wa aci.

18 Amayun, A̱sulazuva a ɗa a̱a̱ra̱ga̱ a̱ tsu,

za va Akiza a Isra'ila, a̱yi ɗa mogono ma̱ tsu.

19 Nu ujumu ɗe vu yuwan ta̱ adanshi a̱tsuma̱ alavu alavu,

a̱ tyo uba̱ta̱ wa̱ a̱za̱ a̱ a̱ɓula̱ a̱ wu.

Vu damma, <<N ca ta̱ a̱soja a na gurai uvon ucira,

n 'ya̱sa̱n ta̱ ulobo a̱tsuma̱ a ama.

20 N tsura̱ ta̱ Da̱wuda aagbashi a̱ va̱,

n tsuwa̱a̱n yi ta̱ mani'in ma akiza ma̱ va̱.

21 Ukere u va̱ u ta̱ da̱na̱ oɓolo na̱ a̱yi.

Amayun, ukere u va̱ u ta ca yi ucira.

22 N'yuwatan ma lyuwa aci a̱ yi shi,

babu vuma wuya na a gura ɓongi yi.

23 N ta̱ rukutsa̱ n'yuwatan ma̱ yi elime a̱yi,

a̱vu mu una aza a na a 'yuwan niyi.

24 Amayun a̱ va̱ ni icigi i va̱ i na i tsu vadala shi,

a̱ ta̱ da̱na̱ oɓolo na̱ a̱yi,

ucira wa̱ yi u ta̱ tsura̱ tsugbain adama a ala a̱ va̱.

25 N ta zuwa tsugono tsa̱ yi

tsa bala a aci a mala,

a̱ tyo zuva vu ɗolu.

26 U ta̱ ɗe mu u damma, <A̱vu ɗa Dada va̱,

A̱sula̱ a̱ va̱ na Aatali e iwawi i va̱!>

27 N ta ɗangwa yi wo o'wo ulobo wu ufaru u va̱,

za na a la'ai tsugbain a̱tsuma̱ o ngono mu uvaɗi.

28 N ta lyuwa elime o rocosu yi

icigi i va̱ i na i tsu vadala shi hali hali.

Nzuwulai n va̱ na̱ a̱yi,

n ta̱ da̱na̱ lo hali hali.

29 N ta̱ shuwa̱ ugundo wa̱ yi hali hali,

tsugono tsa̱ yi waru nna̱ zuva ri lo.

30 <<No olobo a̱ yi a lyawa wila̱ u va̱,

agba a̱ kuru udammu u va̱ shi,

31 nna̱ a kuɗa ili i na n zuwai,

a̱vu a 'yuwan o toni ili i na n dammai,

32 n ta̱ ge'eto le adama o u'ya̱susa̱n wa aci e le

n ta a faba le na asuɗu adama a̱ nusu le.

33 Amma ma tawa icigi i va̱ i na i tsu vadala shi ya̱'a̱ yi shi,

agba ma̱a̱ kuɗa̱ o roco yi amayun a̱ va̱ shi.

34 Maa kuɗa akucunu a̱ va̱ shi,

ko n vadala ili i na una̱ u va̱ u dammai shi.

35 Uta̱ u ɗa goon n kucinai na akiza a̱ va̱,

agba maa yuwaan Da̱wuda epen shi.

36 Ugundo wa̱ yi u ta̱ da̱na̱ lo hali hali,

waru tsugono tsa̱ yi tsa̱ ta̱ da̱na̱ lo,

a̱ ma̱ka̱ka̱n ma̱ va̱ nnu urana wu lo.

37 Tsugono'o u ta̱ shuwa̱ tso woto hali hali,

cine woto'o u ri lyusu va amayun ɗe zuva.>> Wivuwun

38 Agba gogo A̱sulazuva, a̱vu ɗa nda

vu 'yuwan niyi a̱vu vu vari yi,

reve vu yuwan upan lon

na̱ mogono ma na vu tsuwa̱a̱n yi mani'i'in.

39 Vu kuɗa ta̱ akucunu a na vu yuwain

na aagbashi a̱ wu,

reve vu vari ookokolo a̱ yi

vu lungusa̱ yi e iɗa.

40 Vu ɓoso ta̱ kari lyuci va̱ yi suru,

a̱vu vu ka̱mba̱to ba̱ta̱ vu pa'atan vu ucira va̱ yi okongo.

41 Aza a na a̱ ka̱ra̱i lo suru,

a̱ tsi iva̱ ta̱ itana ya̱ yi.

Wo o'wo ta̱ ili yi izo'oshi,

e ekere o nron mu nden ma̱ yi.

42 Vu ca ta̱ n'yuwatan ma̱ yi

ulyuwu wa a aci,

vu zuwa le ta̱ suru

a yuwan ma̱za̱nga̱.

43 Vu vadala ta̱ una̱ u matsun me pe'eni ma̱ yi

wo o'wo ili ye pere,

agba vu kamba yi a̱tsuma̱ o uvon shi.

44 Vu ta̱wa̱a̱ ta̱ nu ukosu u tsugbain tsa̱ a̱ yi,

a̱vu vu vari tsugono tsa̱ yi e iɗa.

45 Vu kutsato yi ta̱ go'o,

a̱vu vu ɓa̱ru yi na̱ wono. Wivuwun

46 A̱sulazuva, hali mantsa ma̱ ne ma ɗa waa tara?

Vu ta̱ soko aciya̱wu hali hali ɗa?

Hali mantsa ma̱ ne ma ɗa

upan wa̱ wu wa̱a̱ da̱na̱ a suɗuwusa tsa akina?

47 Vu cuwan a na wuma u va̱ u ri alanga shi.

Vu yuwan ta̱ vaɗilima̱ pere ɗa?

48 Zane ɗa a̱a̱ da̱na̱ wuma,

agba wa̱ kuwa̱ shi?

Ko u wawa wuma wa̱ yi

diga uba̱ta̱ wu nden wa̱ a̱kwa̱kwa̱? Wivuwun

49 Zagbain, te ɗa icigi yu ufaru ya̱ wu i na i tsu vadala shi,

za na vu kucinaa yi Da̱wuda a̱tsuma̱ a amayun a̱ wu?

50 Zagbain, vu cuwan na̱ cine a yuwayin aagbashi a̱ wu ulamu,

cine n kaɓai asuvu ni izo'oshi i na nɗa suru maa yuwusaan mu.

51 A̱sulazuva, n'yuwatan ma̱ wu

a ta yuwusaan mogono ma na vu tsuwa̱a̱n yi mani'in ulamu,

uba̱ta̱ u na u tyoi suru.

52 Lyawa tsu cuwayi A̱sulazuva hali hali!

Ami! Ami!