1 Uwwai nda,

a̱ɗu ama suru,

zuwai atsuvu,

a̱ɗu na i ri nden

a̱tsuma̱ o uvaɗi.

2 Zagbain na̱ mawun suru,

za vu utsuru na̱ za vu ulambu suru.

3 Una̱ u va̱ u ta yuwan

adanshi o ugbozu,

majiyan mo okolo ma̱ va̱

u ta̱ tapu nu urevu.

4 N ta zuwa ugbozu u va̱

a danshi o udammu,

n cuɗuwa urevu wa̱ yi

mantsa ma na ma taɗasa kumburu.

5 Adama a̱ nye a ɗa

maa uwwa wovon a rana meleshe,

a mantsa ma na a̱za̱ e iwuya

a̱ ka̱nda̱ruwa̱ numu,

6 aza a na a zuwai ucira

o utsuru u le,

aza a na a yuwusan uvaɗu

adama o utsuru wa̱ a̱bunda̱ u le?

7 Amayun, babu vuma na a gura

tsupa wuma o una̱ u vuma ro,

ko u gura tsupa A̱sula̱

adama a wuma wa̱ yi.

8 Adama a na ikebe ya atsupu

a wuma u vuma n ri kece shi,

ili i na wa tsupa suru

wa rawa shi ko ke'en.

9 Adama u da̱na̱ lo hali hali,

ko u putsayi na wa̱ kuwa̱.

10 U tsu zuwa ta̱ a̱za̱ o ugbozu a̱ kuwa̱,

no olo na ama e pere fo,

a̱ ta̱ kuwa̱ a lyawaa

ozo o ro utsuru u le.

11 Ason e le a ɗa

a̱a̱ da̱na̱ 'wa le hali hali,

ɗe ɗa a̱ da̱na̱ mantsa suru,

ko na wo o'woi a ca ta̱

atsusa e le ala le.

12 Tsugbain tsa vuma

tsa putsa yi na wa̱ kuwa̱ shi,

u ta̱ kuwa̱ tsa nama.

13 Ne ɗa ukosu wa aza a na

a zuwaa yi aciyele ucira wo o'wo,

nu ukosu wa aza a na a̱ cuwa̱in

nu utsuru u le.

14 O to ronoso le tsi ikyon

a̱ tyo uba̱ta̱ wu nden wa̱ a̱kwa̱kwa̱,

ukwa̱ u to o'wo za va aguɓa e le.

Nu usana a̱za̱ a̱ a̱ɓula̱ a ta yuwan

tsugbain a aci e le.

Lipu le ta shama a̱tsuma̱ a aason,

uba̱ta̱ wu nden wa̱ a̱kwa̱kwa̱ u ɗa

wo o'wo 'wa le.

15 Amma A̱sula̱ a ta tsupaa wuma u va̱,

diga e ekere o ukwa̱

amayun u ta tara mu

a̱ tyo uba̱ta̱ wa̱ yi.

16 Vu uwa a̱tsumola̱ngu

na̱ vuma o'wo za vu utsuru wan,

ko nu utsuru wu u'wa wa̱ yi wa̱ da̱shishi,

17 adama a na nu u kuwa̱

wa̱ ka̱ra̱ ni ili shi,

utsuru wa̱ yi wo toni yi

a̱ tyo a aason shi.

18 Ko na̱ shi u tara aciya̱yi

za va aba'un,

ko ama a cuwa yi

nu u lyuwa aci,

19 na̱ ne suru u ta cina

nkaya ma̱ yi n na n kuwa̱i ɗe,

aza a na a̱a̱ da̱shi e ene

ekan waru shi.

20 Tsugbain tsa vuma

tsa putsa yi naa wa̱ kuwa̱ shi,

u ta̱ kuwa̱ tsa nama.