1 A̱sula̱, vu uwwa avasa a̱ va̱,

she vu kuɗa̱ a uwwa ipati i va̱ wan.

2 Vu poloo mu atsuvu, vu usu mu.

Adama a na addama a̱ va̱

a zuwa mu ta̱ n kuna̱ ta̱ka̱.

3 Ugbozu u va̱ u 'yon ta̱

adama a̱bunda̱ e elemu a n'yuwatan n va̱,

adama o ule'e wu n'yuwatan.

Adama a na a̱ tsu ronusoo mu ta̱ addama,

waru a 'yuwan mu ta̱ a̱tsuma̱ o upan u le.

4 O okolo a̱ va̱ a̱ ta̱ pe a̱ a̱tsuma̱lima̱,

wovon wu ukwisa̱ u reme mu ta̱.

5 Wovon na̱ meje'en ma̱ lipu

me reme mu ta̱,

mu da'wan ta̱ a̱bunda̱ lon.

6 N damma ta̱,

<<A damma n ta̱ ne evelu tsa muɗa!

N shi ta̱ a 'yawan a̱ ka̱ra̱ mi ivuwan,

7 n shi ta̱ a 'yawan

n ka̱ra̱ a alanga,

n yuwaan aciya̱va̱ u'wa a̱ a̱tsumona. Wivuwun

8 N ta̱ jika̱ a̱ tyo uba̱ta̱ wu upa'anta u va̱,

alanga nu upepu na̱ wunla̱ u vama.>>

9 A̱sulazuva, ra̱pula̱ n'yuwatan n va̱,

a̱vu vu ne'eshen elentsu e le,

adama a na n te inda

u'ya̱susa̱n wu ugbozu na̱ nla̱ngi a̱tsuma̱ a̱ lyuci.

10 Urana na ayin a̱ tsu da̱na̱ ta̱ a agara

a̱ ka̱nda̱ruwusa̱ kari va̱ yi.

Iwuya na addama a shiwan ta̱ a̱ lyuci'i.

11 A̱ lungusa̱ ta̱ lyuci'i suru,

ibili ne epen a shiwan ta̱ e re va̱ yi.

12 A damma ma'yuwatan ma ɗa me isulusa mu,

n shi ta̱ a kaɓa asuvu.

A damma za na ciga numu ɗa shi

ri a̱ nla̱ngi na̱ a̱mu,

n shi ta̱ a pa'an yi.

13 Amma i'utsa̱ i zuzu i va̱ i ɗa

za na n cayi okolo,

14 za na tsu uwwulai lon

mantsa ma na tsu ri a mmalu oɓolo

a̱tsuma̱ e iɓolo ya ama o u'wa wa̱ A̱sula̱.

15 Lyawa ukwa̱ u tara n'yuwatan n va̱ babu urevu,

lyawa a̱ ka̱ra̱ a̱ tyo a ason ele wuma,

adama a na iwuya i tsura̱ ta̱

uba̱ta̱ wu nden a̱tsuma̱ e le.

16 Amma n ɗe ta̱ A̱sula̱,

a̱vu A̱sulazuva a wawa mu.

17 Urana na ayin n tsu shon ta̱ na̱ ma̱nga̱,

a̱vu wu uwwa uɗyo u va̱.

18 U ta wawa mu

diga o uvon u na a yuwusan na̱ mu,

ko na wo o'woi na̱ a̱bunda̱ a 'yuwan mu ta̱.

19 A̱sula̱ a na a yuwusan tsugono hali hali,

u ta uwwa a̱vu u ca le a̱tsuma̱lima̱, wivuwun

ama a na a tsu vadala diga e re le shi

waru a uwwusa wovon wa̱ A̱sula̱ shi.

20 I'utsa̱ i va̱ i ndolo gba

u riya̱a̱ ta̱ i'utsa̱ ya̱ yi,

reve u kuɗa akucunu a̱ yi.

21 U ta̱ nu una̱ wu uyo'o a adanshi a̱ yi,

na̱ ne suru uvon u to o okolo a̱ yi,

idanshi yu una̱ ya̱ yi i ta̱ pete,

na̱ ne suru a̱ ta̱ tsa̱ aya a na o ronoi.

22 I lyawaa A̱sulazuva ili i na ya̱a̱ ɓa̱la̱ ɗu,

a̱yi waru u ta e idana ɗu,

waa lyawa za va̱ a̱ɓula̱ riya̱ shi ko ke'en.

23 Amma a̱vu, A̱sula̱,

vu ta tawa a̱za̱ e iwuya,

a̱ tyo a̱ a̱a̱ka̱ri o ukototosu

a̱za̱ wocosu wu mpasa na̱ a̱za̱ epen,

babu za na a rawa uɓatsulai wu rana wuma wa̱ yi.

Amma a̱mu gba, n zuwa ta̱ ucira u va̱ ya̱'a̱ wu.