1 Okolo a̱ va̱ a̱ ta̱

tapu ni idanshi i sa'ani,

m ɓatsa ta̱ ishipa i nda

adama o mogono.

Eelentsu a̱ va̱ a̱ ta̱

tsa maɗanutsu,

e ekere a za vu uguru.

2 A̱vu mogono vu la'a ta̱

za suru a̱tsuma̱ a ama,

vu tsu yuwan ta̱ adanshi a sa'ani,

A̱sula̱ a zuwaa wu ta̱

aba'un hali hali.

3 Vu wo'o matsun me pe'eni ma̱ wu

yali yu uvon,

vu ta̱ na̱ tsugbain na̱ a̱ɓula̱!

4 A̱tsuma̱ a tsugbain tsa̱ wu,

vu yuwan mmalu

a̱tsuma̱ o ulyuwu wa aci,

o una̱ u mejege na̱ a̱ɓula̱.

Lyawa ukere u sa'ani wa̱ wu,

u yuwan ulinga wa asalama!

5 Aya a̱ wu a̱ ta̱ ucembeɗu lon,

a sapusa o okolo

a n'yuwatan m mogono,

nɗa n ta̱ riya̱sa̱

za̱la̱ va̱ wu.

6 Ootogu o tsugono tsa̱ wu

diga uba̱ta̱ wa̱ A̱sula̱ a ɗa,

na ri hali hali,

aaɗanga a tsugbain tsa̱ wu

za mejege ɗa.

7 Vu ciga ta̱ ili i na i ri mejege,

vu 'yuwan ta̱ iwuya.

A̱yi ɗa i zuwai A̱sula̱,

A̱sula̱ a̱ wu, u tawa nuwu.

A̱vu u sukuma wu

na̱ mani'in ma̱ ma̱za̱nga̱

reve u ca wu tsugbain

ula'awu na̱ n'utsa̱ ma̱ wu.

8 Itana ya̱ wu a̱ ta̱ uta̱sa̱,

ma̱guru ma̱ aturare a̱ mur

na̱ alo na̱ Kasiya.

Tsuwe'e diga a 'wa vu ngono,

na a 'wa na ri wukalu na anga a agiwa,

a ta zuwusa wu ma̱za̱nga̱.

9 Muwun ma̱ esheli mu ngono

n ta̱ pe a̱tsuma̱ a̱ a̱ma̱ci

a na acasu tsugbain

o ukere usa'ani wo ootogu o tsugono tsa̱ wu,

egbere ta̱ lo mishin,

wotowu ni itana

i zinariya i na i la'ai ulobonu.

10 A̱vu usheli u va̱,

vu polo atsuvu vu uwwa

ili i na maa damma,

vi icina na a ama a̱ wu na̱ mmaci ma̱ wu.

11 Mogono ma̱ te ene ulobonu wa̱ wu,

a̱vu wu uwwa maluwa ma̱ wu,

na wo o'woi a̱yi vali va̱ wu ɗa,

a̱vu vu yuwaan yi tsutoni.

12 Ama a Taya a̱ ta̱ ta̱wa̱a̱ wu na̱ ne'e,

a̱za̱ o utsuru a ta zami isa'ani ya̱'a̱ wu.

13 Kasa'avu mogono ta a maa uwa

o u'wa u mogono,

a gura kurato ulobonu wa̱ yi shi.

A̱ zula̱ ta̱ itana ya̱ yi

na̱ a̱punda̱ a zinariya.

14 A̱ 'ya̱wa̱ ta̱ na̱ a̱yi uba̱ta̱ u mogono

wotowu ni itana i sa'ani i wukalu,

nan na̱wa̱yi a̱yi esheli a̱ shewun yi ta̱.

15 A̱ shewun le ta̱ na̱ ma̱za̱nga̱ na̱ mere,

a uwa o u'wa u mogono.

16 Mogono vu ta matsan

olobo na̱ a̱bunda̱,

a ta tara tsugbain tsu nkaya ma̱ wu.

Vu ta̱ zuwa le a yuwan tsugono

tsu uvaɗi suru.

17 N ta zuwa a cuwan na ala a̱ wu,

diga mantsa a̱ tyo mantsa,

tsa̱ra̱ elentsu a cuwa wu,

hali hali hali.