1 A̱sulazuva uwwa avasa a̱ va̱,

vu poloo ipati i va̱ atsuvu

vee ene iliyali i va̱,

vu usu mu a̱tsuma̱ a amayun a̱ wu,

na̱ a̱tsuma̱ a̱ɓula̱.

2 She vu ge'eto aagbashi✝ a̱ wu wan,

adama a na babu za wuma na ri

na̱ a̱ɓula̱ a̱ ma̱ka̱ka̱n ma̱ wu.

3 Ma'yuwatan ma̱ va̱ ma gbagba mu ta̱,

u minjira mu ta̱ e iɗa.

U zuwa mu ta̱ n da̱nu a̱tsuma̱ e irumbu

tsa aza a na a jimai ɗe ukwa̱.

4 Adama o ndolo mu uta̱a̱ ta̱ ookolo,

okolo a̱ va̱ a dama ta̱ lon.

5 N cuwusan ta̱ na̱ rana na ka̱ra̱i,

n ta̱ majiyan ma linga va̱ wu suru,

n ta majiyan e ekere a linga ve ekere a̱ wu.

6 N 'ya̱sa̱n ta̱ ekere a̱ va̱ a̱ tyo ya̱'a̱ wu,

wuma u va̱ u ta maluwa ma̱ wu

tse e iɗa yu u'yewu i na i ri na akuli.Wivuwun

7 A̱sulazuva, jika̱ vu usu mu,

okolo a̱ va̱ a kuɗa ta̱!

She vu sokowo mu urewesu wa̱ wu wan,

ta̱wa̱ mo o'wo tsa aza a na a̱a̱ zurusa̱ a̱ tyo o ukwisa̱ wan.

8 Lyawa usana suru mu uwwa aɗa

e icigi ya̱ wu i na i tsu vadala shi,

adama a na n zuwa ta̱ ucira u va̱ ya̱'a̱ wu.

Roco mu ure u na ma̱a̱ kuru,

adama a na ya̱'a̱ wu ɗa n zuwai wuma u va̱.

9 A̱sulazuva, vu wawa mu

e ekere a n'yuwatan n va̱,

uba̱ta̱ wa̱ wu u ɗa maa zamishi upa'atan.

10 Roco mu n yuwan ili i na vu cigai,

adama a na a̱vu ɗa A̱sula̱ a̱ va̱.

Lyawa Ruhu vi isa'ani va̱ wu u ronoo mu aɗanga

a̱tsuma̱ o ure u na u ri mejege.

11 A̱sulazuva, adama a tsugbain tsa aala a̱ wu,

vu wawa wuma u va̱,

a̱tsuma̱ a̱ a̱ɓula̱ a̱ wu,

vu uta̱a̱ wuma u va̱ a̱tsuma̱ a addama.

12 A̱tsuma̱ e icigi ya̱ wu i na i tsu vadala shi,

vu kototo n'yuwatan n va̱,

vu kototo aza a na a 'yuwan numu,

adama a na a̱mu aagbashi a̱ wu a ɗa.