1 A̱sula̱, adama a̱ nye vu vari ntsu hali hali?

Adama a̱ nye upan wa̱ wu u ri a aci a ama a̱ wu ikyon ya aguɓa a̱ wu?

2 Vu cuwan na ama a̱ wu na vu wawai ɗe nu ujimu,

elentsu agadu a̱ wu na vu tsupayi.

Vu cuwan na̱ Masasan ma̱ Sihiyona

uba̱ta̱ wu nden ma̱ wu.

3 Ta̱wa̱ ve ene okongo a nda,

n'yuwatan n lungusa̱ ta̱ ili i na i ri pe a̱ a̱a̱'isa̱ a nda suru.

4 N'yuwatan ma̱ wu n yuwan ta̱ yisaali yu ulyuwu wa a aci,

uba̱ta̱ u na vu tsu ga'asan na̱ a̱tsu.

Reve a̱ shuwa̱ atuta e le

o una̱ wi iroci yu ulyuwu wa a aci.

5 A̱ ta̱ cine vu revei ozo o koɗo a ɗanga

oo koɗuso ɗanga a̱ a̱a̱rumbu na aɓau e le.

6 Reve o ɓoso she'en na a yuwain na akpata,

na aɓau na̱ ma̱ka̱ta̱.

7 A̱ kula̱to ta̱ a̱a̱'isa̱ a̱ wu

hali she na wo ocoi,

reve a̱ ka̱mba̱to uba̱ta̱ wu nden wa ala a̱ wu idaba.

8 A̱vu a jiyan o okolo e le,

<<Tsu ta̱ rukutsa̱ le suru suru!>>

A̱vu a̱ kuloto uba̱ta̱ u na ama a yuwusaan A̱sula̱ a̱ga̱nda̱ e iɗa'a suru.

9 Tsu da̱shi ene iroci ya asalama i ro waru shi,

agba vumava̱sula̱ buwa shi,

waru a̱tsuma̱ a̱ tsu babu za na revei urana u na ili i nda yoo koto.

10 A̱sula̱, hali mantsa ma̱ ne ma ɗa

n'yuwatan maa yuwaan wu ulamu?

N'yuwatan n ta lyuwa elime o goroso ala a̱ wu hali hali?

11 Adama nye vu ronoi ukere wu ucira wa̱ wu?

Ba̱ruwa̱ yi adama vu kototo le!

12 Amma a̱vu A̱sula̱, a̱vu ɗa mogono ma̱ va̱ nu ujumu,

vu ta̱wa̱ ta̱ ni iwawi a̱tsuma̱ o uvaɗi.

13 Vu ne'eshen ta̱ mala nu ucira wa̱ wu,

reve vu ɓoso aci o ododo a na a̱ ri pe a̱ mini.✝

14 A̱vu ɗa vu rukutsa̱i aci o a̱dodo Leviyatan,✝

a̱vu vu ka̱mba̱to yi ilyalya e ekere inama yu una.

15 A̱vu ɗa vu kpa̱tu'wa̱i esu a̱ mini na̱ ɗolu,

reve vu ukwaton ɗolu gbagbain.

16 Urana na ayin a̱za̱ a̱ wu a ɗa,

a̱vu ɗa vu shuwa̱i urana na̱ woto.

17 A̱vu ɗa vu zuwai tyo vu uvaɗi suru,

a̱vu vu zuwa mantsa ma̱ lyushi ni irana.

18 A̱sulazuva, vu cuwan cine n'yuwatan ma̱ wu

maa yuwusaan wu ulamu,

cine olo o a̱ lungususa̱ ala a̱ wu.

19 She vu lyawa ama a̱ wu na a̱ ri ni ikambishi shi

e ekere a̱za̱ a̱ e iwuya wan.

She vi icina na aza a na a casu

a̱tsuma̱lima̱ hali hali wan.

20 Vu cuwan na̱ nzuwulai ma̱ wu,

adama a na u'ya̱susa̱n wu ugbozu u shiton ta̱ oboguzu e irumbu biti e iɗa'a.

21 She vu lyawa aza a na oo ɓongishi a uwwa wono wan.

Lyawa alambi na aza a na a cigai ikambishi a cuwa ala a̱ wu.

22 'Yon, A̱sula̱, vi isawaan aciya̱wu!

Vu cuwan cine olo a yuwusaan wu ulamu urana suru!

23 She vi icina nu u'ya̱susa̱n wu uɗyo wu n'yuwatan ma̱ wu wan.

She vi icina na̱ a̱gidi'ya̱ a na n'yuwatan ma̱ wu n tsu yuwusan wan.