1 Cuwai A̱sulazuva!

Amayun, ili i sa'ani i ɗa,

a canaa A̱sula̱ a̱ tsu ishipa yi ica.

Amayun, ili yu ulobonu i ɗa,

waru wu ntsaa ta̱ a cuwa yi!

2 A̱sulazuva a̱ ta̱ da̱shi suwusa Urishelima,

u to ɓolotosu aza a Isra'ila

a na a̱ 'ya̱wa̱i tsugbashi.

3 U tsu ka̱mba̱to ta̱

aza a na okolo e le a kuɗai gbaga,

reve wu nla̱ antsu e le.

4 U tsu kece ta̱ a̱bunda̱ e italyo'o,

a̱vu u ɗe koyan suru na aala a̱ yi.

5 A̱sulazuva a̱ tsu zagbain ɗa,

waru u ta̱ nu ucira lon,

urevu wa̱ yi u ri na̱ a̱ tyo shi.

6 A̱sulazuva a̱ tsu 'ya̱sa̱n ta̱ aza a na

a tarai aciyele ili i ro shi,

amma u tso oco ta̱ a̱za̱ e iwuya e iɗa.

7 Canaa yi A̱sulazuva ishipa yu ugodyusho,

canaa yi A̱sula̱ a̱ tsu

ishipa yi ica na̱ kumburu.

8 U tsu ɓa̱ru ta̱ zuva ne eleshe,

u tsu ca ta̱ uvaɗi iro'i,

reve u zuwa anlya,

a kungwa a agaɗi.

9 U tsu ca ta̱ inama ilyalya i le,

na̱ muwun ma akakan waru,

a mantsa ma na a̱ ri a yisali.

10 U zuwa ucira wa̱ yi o ucira wu do shi,

ko u zuwa ucira wa̱ yi uba̱ta̱ u vuma shi.

11 A̱sulazuva a tsu uwwa ta̱ uyo'o

wa aza a na a uwwusa wovon wa̱ yi,

aza a na a zuwusa ucira u le,

uba̱ta̱ wi icigi ya̱ yi i na i tsu vadala shi.

12 Vu ca A̱sulazuva tsugbain, a̱vu Urishelima!

Vu cuwa A̱sula̱ a̱ wu a̱vu Sihiyona!

13 Adama a na u zuwa ta̱,

irumu yu una̱ntsu va̱ wu a̱ da̱na̱ nu ucira,

u tsu zuwaa ta̱ ama a̱ wu aba'un.

14 U tsu ta̱wa̱a̱ ta̱ na̱ asuvu nden o utyo wi iɗa ya̱ wu,

a̱vu u cuwa̱ton wu no oroci a yitabo i sa'ani.

15 U tsu lyungu ta̱ nu udammu wa̱ yi o uvaɗi,

babu usa̱n adanshi a̱ yi a tsu rawa o uvaɗi.

16 U tsu lyungu ta̱ na̱ atayan tsi iro'i

cine vu revei tsikilu,

reve u baza a'iza tso okomo.

17 U tso oco ta̱ atayan a̱ yi,

tsa atali e keke'en.

Zane ɗa aa gura kaɓa asuvu nu uta̱nu wa̱ yi?

18 U tsu lyungu ta̱ na adanshi a̱ yi,

reve wu jeruweto le,

u tsu zuwa ta̱ upepu wa̱ yi wi ivula̱,

a̱vu mini ma suma.

19 U ca ta̱ Yakubu ikaka ya̱ yi,

ili i na u zuwai na̱ wila̱ wa̱ yi

a̱ tyo ya Isra'ila.

20 U yuwaan iɗa i ro tsunda shi,

waru e reve wila̱ wa̱ yi shi.

Cuwai A̱sulazuva!