1 I yuwan ishipa i ma̱za̱nga̱ a̱ɗu a̱za̱ a̱ɓula̱,

adama a na wuntsaa ta̱

aza amayun okolo a yuwaan yi ica.

2 I yuwaan A̱sulazuva ica ni igaraya,

i wa'a yi ishipa yi ica,

na̱ kumburu va a'yin kupa.

3 I canaa yi ishipa i sa'avu,

i yuwan tsuwe'e nu uguru,

reve i 'ya̱sa̱n uɗyo na̱ ma̱za̱nga̱.

4 Adama a na adanshi a̱ A̱sulazuva

mejege ma ɗa na amayun,

waru u ta̱ na amayun

a̱tsuma̱ e ili i na waa yuwusan biti.

5 A̱sulazuva a ciga ta̱ a̱ɓula̱

nu uge'etosu wa amayun,

uvaɗi u ta̱ tapu

ni icigi ya̱ yi i na i tsu vadala shi.

6 E idanshi ya̱ yi i ɗa A̱sulazuva a yuwain zuva.

O udammu wa̱ yi u ɗa a yuwain

urana, woto oɓolo ni italyo'o ya zuva.

7 U ɓoloto ta̱ mini ma mala suru uba̱tu ta̱,

reve u soko mini ma mala ma̱ a̱ru'un

cine vuma tsu soko ishina aasula e izuwa.

8 Lyawa uvaɗi ma̱ɓula̱ wu uwwa

wovon wa̱ A̱sulazuva,

lyawa ama o uvaɗi ma̱ɓula̱

a ca yi tsugbain.

9 Ana u yuwain adanshi,

reve uvaɗi wo o'wo,

u ca ta̱ udammu,

reve ili suru yo o'wo.

10 A̱sulazuva a̱ tsu lungusa̱ ta̱ ifoɓi yi nɗa,

u tsu putsa ta̱ a ama a yuwan ifoɓi i le.

11 Amma ifoɓi ya̱ A̱sulazuva,

a tsi isawan ta̱ hali hali,

na̱ majiyan mo okolo a̱ yi a mantsa suru.

12 Za ma̱za̱nga̱ ɗa iɗa i na,

A̱sula̱ a ɗa A̱sulazuva e le,

ama a na u ɗangwai

o'wo ili ya agadu a̱yi.

13 Diga zuva A̱sulazuva a̱ tsu ka̱lyuwa̱ ta̱,

a̱vu we ene vaɗilima̱ suru.

14 Diga uba̱ta̱ wu nden ma̱ yi u tsu idana ta̱,

aza a na a̱ ri nden a̱tsuma̱ o uvaɗi suru.

15 A̱yi ɗa u yuwain okolo ama suru,

u tsu reve ta̱ ili i na a yuwusan suru.

16 Mogono ma̱ tsu tsura̱ ulyuwu wa a aci

adama a̱bunda̱ ali o uvon a̱ yi shi,

ko za na gurai uvon la'a

adama o ucira wa̱ yi shi.

17 Mazuwa mo okolo o do vu uvon ili ye pere i ɗa,

na̱ a̱bunda̱ o ucira wa̱ yi suru,

waa gura wawa za shi.

18 Amma esu a̱ A̱sulazuva,

a̱ ta̱ uba̱ta̱ wa aza a na

a uwwusa wovon wa̱ yi,

e ekere aza a na a zuwai okolo e le

uba̱ta̱ wi icigi ya̱ yi

i na i tsu vadala shi.

19 U tsu wawa le ta̱ a̱tsuma̱ o ukwa̱,

waru u lyawa le wuma

a mantsa ma ambulu.

20 Tsu zuwa ta̱ okolo a̱ tsu

e ekere a̱ A̱sulazuva,

a̱yi ɗa ikambi i tsu

waru a̱a̱ra̱ga̱ a̱ tsu.

21 Okolo a̱ tsu a yuwan ta̱ ma̱za̱nga̱ na̱ yi,

adama a na tsu zuwa ta̱ okolo a̱ tsu

uba̱ta̱ wa aala akiza a̱yi.

22 A̱sulazuva lyawa icigi ya̱ wu

i na i tsu vadala shi,

u da̱na̱ oɓolo na̱ a̱tsu,

na wo o'woi tsu zuwai okolo a̱ tsu ya̱'a̱ wu.