1 Ciɓalai A̱sulazuva!

Ciɓalai ala a̱ A̱sulazuva!

Ciɓala niyi, a̱ɗu agbashi a̱ A̱sulazuva.

2 A̱ɗu na yaa yuwusan a̱ga̱nda̱ o u'wa wa̱ A̱sulazuva,

a̱tsuma̱ o ukowo wu u'wa wa̱ A̱sula̱ a̱ tsu!

3 Ciɓalai A̱sulazuva,

adama a na A̱sulazuva a̱ tu ulobonu!

Canayi ala a̱ yi ishipa yi ica,

adama a na A̱sulazuva a̱ tu ulobonu.

4 Adama a na A̱sulazuva a ɗangwaa ta̱ aciya̱yi Yakubu,

Isra'ila waru wo o'wo itana ya̱ yi.

5 N reve ta̱ A̱sulazuva a̱ ta̱ na̱ tsugbain,

A̱sulazuva a̱tsu a la'a ta̱ musula̱ suru.

6 A̱sulazuva a tsu yuwan ta̱

ili i na i lobono niyi,

a̱tsuma̱ a zuva no o uvaɗi,

na̱ a̱tsuma̱ a mala na̱ a̱tsuma̱ a a̱ru'un e le suru.

7 U tsu 'ya̱sa̱n ta̱ eleshe diga o ukosu wu uvaɗi,✝

u tsu lyungu ta̱ ni imaɗatsu adama a̱ mini,

waru u tsu uta̱a̱ ta̱ upepu

diga o u'wa wi izuwa ya̱ yi.

8 A̱yi ɗa u kototoi

muwun mu ufaru ma Masar✝,

muwun mu ufaru ma ama

na̱ a̱za̱ e iliyamunga suru.

9 U lyungu ta̱ iroci ni ili ya asalama

e memere ma̱ wu, a̱vu Masar,

a aci a Firi'awuna na agbashi a̱ yi suru.

10 U kototo ta̱ nɗa na̱ a̱bunda̱✝,

a̱vu wu una ngono mu ucira,

11 Sihon mogono ma aza a Amoriya

na̱ Og mogono ma Bashan,

na̱ ngono ma Ka'ana suru,

12 a̱vu u ca nɗa n le mo o'wo agadu,

ili ya agadu uba̱ta̱ wa ama a̱ yi aza a Isra'ila.

13 A̱sulazuva, ala a̱ wu a̱ ri nu ukosu shi,

A̱sulazuva ala a̱ wu a̱ ta̱ lo hali mantsa suru.

14 Adama a na A̱sulazuva

o to roco a na ama a̱yi a̱ ri nu unusu shi,

a̱vu we ene iliyali ya agbashi a̱yi.

15 A̱ma̱li a nɗa n ro azurufa ɗa na̱ zinariya✝,

i na ekere a vaɗilima̱ a yuwain.

16 A̱ ta̱ na̱ na̱ agba a tsu yuwan adanshi shi.

A̱ ta̱ ne esu agba e tse ene shi.

17 A̱ ta̱ na atsuvu, agba a tsu uwwa shi,

waru a̱ ri nu wivuwun a̱ na̱ le shi.

18 Aza a na aa yuwusan musula̱'a̱

o to o'wo tsa̱ le,

ne ɗa waru aza a na aa zuwusaa le ucira

a̱ ta̱ o o'wo tsa̱ le.

19 A̱ɗu U'wa wa Isra'ila, ciɓala A̱sulazuva!

U'wa wa Haruna ciɓala A̱sulazuva!

20 U'wa̱ wa̱ Levi ciɓala A̱sulazuva!

A̱ɗu aza a na yaa uwwusa wovon wa̱ A̱sulazuva,

ciɓalai A̱sulazuva!

21 Ica a̱ tyo e ekere a̱ A̱sulazuva

diga Sihiyona,

a̱ yi na u ri nden a̱tsuma̱ a̱ Urishelima!

Ciɓalai A̱sulazuva!