1 A̱sula̱, vu kamba mogono

na waa yuwan uge'etosu wa amayun,

vu ca yi a̱ɓula̱ a̱ wu,

2 na wee ge'eto ama a̱ wu na̱ a̱ɓula̱,

aza a na oo ɓongishi na̱ mejege.

3 Lyawa nsasan n ta̱wa̱a̱ ama nu ulyuwu we elime,

agaɗi waru o uta̱a̱ ili ya̱ a̱ɓula̱.

4 Lyawa mogono me isawaan aza a na oo ɓongishi a̱tsuma̱ a ama,

waru u wawa muwun ma aza a na a cigai ikambishi,

a̱vu u kototo a̱za̱ o ule'e.

5 Lyawa a uwwa wovon wa̱ wu

nna̱ urana na̱ woto a̱ ri zuva,

diga mantsa a̱ tyo mantsa.

6 Lyawa mogono mo o'wo tse e iro'i a anlya a na oo topuso

tsa̱ yiji'in i na yo ocusho e iɗa.

7 Lyawa a̱tsuma̱ a rana va̱ yi a̱za̱ a̱ɓula̱ a bala,

waru ulyuwu we elime u da̱na̱ lo

hali she na̱ woto u puwa̱a̱n.

8 Lyawa u yuwan tsugono diga a mala a̱ tyo a mala,

diga o Uɗolu wa̱ Yufiriti a̱ tyo o ukosu wu uvaɗi.✝

9 Lyawa gundo na ri a̱tsumona a̱ kingyowa̱ yi,

waru n'yuwatan ma̱ yi o kototo le.

10 Lyawa ngono ma Tarshishi

na aza a na a̱ ri a pasu vu nge'en m mala,

a̱ ta̱wa̱a̱ yi nu utafa ule.

Lyawa ngono ma Sheba na̱ Seba

a̱ ta̱wa̱a̱ yi na̱ ne'e.

11 Lyawa ngono suru a̱ ka̱ɗa̱towa̱ yi,

waru nɗa n yuwaan yi a̱ga̱nda̱ suru.

12 Adama a na u ta wawa aza a na a cigai ikambishi

a na a̱ showen niyi,

aza a na oo ɓongishi

agba a̱ ri na̱ za na aa kamba le shi.

13 U te ene iliyali ya aza a na a̱ ri babu ucira na̱ a̱za̱ o ulambu,

waru u wawa wuma wa aza a na a cigai ikambishi.

14 U ta wawa le diga e ekere aza a na oo ɓongishi le

na aza a na ee le'eshe le,

adama a na wuma u le u tu ulobonu uba̱ta̱ wa̱ yi.

15 Wuma u mogono u jima!

Lyawa a ca yi zinariya diga Sheba.

Lyawa ama a yuwaan yi avasa mantsa suru,

a pati A̱sula̱ a zuwaa yi aba'un urana suru.

16 Lyawa a̱ tsura̱ ishina ya̱a̱ a̱bunda̱ a̱tsuma̱ e iɗa'a.

Lyawa itana yu una i shiton agaɗi,

a matsan muwun tsa ɗanga m Masasan ma Lebanon.

Lyawa ama a shiwan e ilyuci,

tsa anlya a atsusa.

17 Lyawa ala o mogono a̱ da̱na̱ lo hali hali,

lyawa u lyuwa elime nnu urana u ri lo.

Lyawa nɗa suru n tsura̱ aba'un o una̱ wa̱ yi,

a̱vu e ɗe yi za va aba'un.

18 Lyawa tsu cuwayi

A̱sulazuva A̱sula̱ aza a Isra'ila,

za na a̱yi ɗa goon tsu yuwan linga va asalama!

19 Lyawa tsu cuwayi ala a tsugbain tsa̱ yi babu ukotu.

Lyawa uvaɗi ma̱ɓula̱ u shiwan na̱ tsugbain tsa̱ yi.

Ami! Ami!

20 A̱yi ɗa ukosu wa avasa a̱ Da̱wuda ulobo wa̱ Yese.