1 A̱sula̱ a na maa yuwusaan ica,

she vu rungwa̱ kpaku wan!

2 Adama a na a̱za̱ e iwuya

na̱ a̱za̱ a̱ a̱lumu

a̱ kpa̱tu'wa̱ ta̱ na̱ le

a̱ nla̱ngi na̱ a̱mu,

a ta yuwusan adanshi avama a aci a̱ va̱

ne elentsu e epen.

3 A̱ ka̱nda̱ruwa̱ mu ta̱

na adanshi a n'yuwunlai,

a̱vu a̱ riya̱a̱ mu babu ufaru.

4 N roco le ta̱ icigi

agba a 'yuwan mu ta̱

amma a̱mu za va avasa a ɗa.

5 A̱ tsu ka̱mbuwa̱ mu ta̱ ni iwuya

o una̱ wi isa'ani,

reve a 'yuwan mu

o una̱ wi icigi.

6 A dansa, <<Vu ɗangwa za vi iwuya

na a yuwan nla̱ngi na̱ a̱yi.

Lyawa za na isawan niyi

'yuwan a damma mejege.

7 Mantsa ma na e ge'eto niyi,

lyawa e reme yi nu unusu,

waru lyawa avasa a̱ yi

wo o'wo yi unusu.

8 Lyawa rana va̱ yi

vo o'wo meketeci,

lyawa za ro tara

tsugbain tsa̱ yi.

9 Lyawa muwun ma̱ yi

mo o'wo mkpa'an

ka va̱ yi fo

wo o'wo ma̱runa̱!

10 Lyawa muwun ma̱ yi

mo o'wo aza a agara e ipati,

lyawa a̱ gba̱ra̱ le a 'wa le na ri okongo.

11 Lyawa za na o tonoi utan

u usa ili i na u ri na̱ a̱ yi suru,

lyawa omocin a usa

melen ma̱ yi.

12 She a̱ tsura̱ za na

o roco yi isa'ani wan,

ko a̱ ka̱lyuwa̱ mkpa'an ma̱ yi

ni iliyali wan.

13 Lyawa ugundo wa̱ yi suru u koto,

hali e icina na ala e le a mantsa me elime.

14 Lyawa a cuwan

na̱ nusu vu nkaya ma̱ yi

a̱ ma̱ka̱ka̱n ma̱ A̱sulazuva,

waru she e icina na̱ nusu

va mma va̱ yi wan.

15 Lyawa A̱sulazuva a cuwan

na̱ nusu nda mantsa suru,

tsa̱ra̱ u tawa majiyan ma̱ le

a̱tsuma̱ o uvaɗi.

16 Adama a na u tsu cuwan

na waa yuwan isa'ani shi,

amma u tsu saɓa ta̱ alambi

na aza a na a cigai ikambishi

na aza a na okolo e le a kuɗai,

tsa̱ra̱ wu una le.

17 U ciga ta̱ mayan mo una̱,

lyawa una̱ u toni yi,

u tsu yuwan ma̱za̱nga̱ na aba'un shi,

lyawa u yuwan alanga na̱ a̱ yi.

18 Wo o'woto ta̱ wisulusa

cine vu revei utugu,

lyawa u re'weto yi

cine vu revei mini,

u uwa e etele a̱ yi

cine vu revei mani'in.

19 Na amayun wisulusa wo o'woi yi ta̱ a̱tugu

o to o'wo tsa gbakala na wu nla̱i urana biti.>>

20 Lyawa a̱yi nda wo o'wo

akunda atsupu a za na 'yuwan numu

diga uba̱ta̱ wa̱ A̱sulazuva,

a̱ tyo uba̱ta̱ wa aza a na a yuwusan

adanshi a avama a aci a̱ va̱.

21 Amma a̱vu A̱sulazuva Zagbain,

vu toni na̱ a̱mu mejege

adama a ala a̱ wu,

a̱tsuma̱ e icigi ya̱ wu i na i tsu vadala shi,

vu wawa mu!

22 Adama a na a̱mu

za vu ulambu ɗa

za na cigai ikambishi,

n ta uwwusa mɓa̱la̱

o okolo a̱ va̱.

23 M puwa̱n ta̱ cine vu revei

ululu u tsu puwa̱n nu ulivu,

a̱ za̱ka̱tsa̱ mu ta̱

cine vu revei aapapari a na uta̱nu u guza̱i.

24 A̱lu a̱ va̱ a̱ ɗa̱mba̱ ta̱

adama a akuli,

a̱vu lipu va̱ ramba

wo o'wo babu ucira.

25 Mo o'wo ta̱ ili yi izo'oshi

uba̱ta̱ wa ama a na

a yuwusaan mu ulamu,

ne e ene mu

a̱vu a gbaɗatsasa aci e le.

26 Kamba mu, A̱sulazuva A̱sula̱ a̱ va̱!

Vu wawa mu a̱tsuma̱ e icigi ya̱ i na i tsu vadala shi!

27 A̱sulazuva! Lyawa n'yuwatan n va̱

n reve a na a̱vu ɗa

vu wawa numu.

28 A ta gura yuwaan mu una̱,

amma vu ta zuwaa mu aba'un,

a mantsa ma na a̱ riya̱a̱ numu,

a ta uwwa wono,

amma aagbashi a̱ wu

a ta yuwan ma̱za̱nga̱.

29 Wono u ta̱ ɓa̱ru

n'yuwatan n va̱.

Reve wu pala le

tsu umuna.

30 Nu una̱ u va̱ u ɗa

ma̱a̱ godyowo

A̱sulazuva a̱bunda̱ lon,

n ta cuwa yi e memere

ma ama a̱ a̱bunda̱.

31 Adama a na u tsu isawaan ta̱

za na cigai ikambishi,

adama u wawa wuma wa̱ yi,

e ekere aza a na

a cigai o kototo yi.