1 U tu ulobonu o godyoo A̱sulazuva,

a canaa ala a̱ wu ica,

Mogono ma̱ A̱sula̱.

2 A ca ucuɗuwu,

wi icigi ya̱ wu nu usana,

na amayun a̱ wu na ayin,

3 na̱ malapa me igaraya va a'yin kupa

nu uɗyo wu uyo'o wu kumburu.

4 A̱sulazuva, linga va̱ wu va asalama,

a zuwa mu ta̱ ma̱za̱nga̱.

N cana ta̱ ishipa i ma̱za̱nga̱

adama a linga ve ekere a̱ wu.

5 A̱sulazuva, linga va̱ wu a̱ ta̱ gbagbain,

majiyan ma̱ wu ma̱ ta̱ a̱ru'un lon!

6 Ulo waa gura reve ili shi.

A̱ta̱mu waru a gura reve

ili i nda shi,

7 ko na wo o'woi a̱za̱ e iwuya

a ta balasa tsa anlya,

aza mayan me iwuya waru

aa lyuwusa elime,

na̱ ne suru o to kototo le hali hali.

8 Amma a̱vu A̱sulazuva,

a̱vu ɗa za na a yuwusan

tsugbain hali hali.

9 A̱sulazuva, ka̱lyuwa̱ n'yuwatan ma̱ wu

na amayun n'yuwatan ma̱ wu n ta̱ kuwa̱,

a̱za̱ e iwuya suru a̱ ta̱ bete'we.

10 Amma vu ca mu ta̱ ucira tsa yacin,

vu zuwaa mu ta̱ aba'un na̱ ma̱za̱nga̱.

11 Esu a̱ va̱ e ene ta̱

ukototosu wu n'yuwatan n va̱,

atsuvu a̱ va̱ a uwwa ta̱

yisaali yu ukototosu u le.

12 A̱za̱ a̱ a̱ɓula̱ a ta bala,

tsu uɗanga wu ushuwa,

a ta yuwan mgbain,

tsu uɗanga u sida wa Lebanon,

13 na a̱ shuwa̱i o u'wa wa̱ A̱sulazuva,

a ta bala o ukowo wa̱ A̱sula̱ a̱ tsu.

14 Na̱ tsukutsa tsa̱ le

a̱a̱ ta̱ da̱na̱ a mamatsan,

a̱a̱ ta̱ da̱na̱ uta̱nu kuci.

15 Nda roco ta̱ A̱sulazuva za va̱ a̱ɓula̱ a ɗa,

a̱yi ɗa aatali a̱ va̱,

babu iwuya a̱tsuma̱ a̱ yi.