1 Lyawa A̱sulazuva a uwwa wu,

a mantsa ma̱ a̱tsuma̱lima̱!

Lyawa ala a̱ A̱sula̱ a Yakubu,

wo o'wo wu mapari!

2 Lyawa u lyungu wa̱ wu ni ikambi,

diga uba̱ta̱ wu nden ma akiza a̱ yi,

waru u ca wu ikambishi,

diga Sihiyona.

3 Lyawa u cuwan,

na̱ kucci va̱ wu suru,

waru wu uwwa uyo'o,

u kucci vu ukula̱tosu va̱ wu suru!

4 Lyawa u ca wu,

ili i na okolo a̱ wu a cigai biti,

u cawu ulyuwu wa aci,

a̱tsuma̱ e ifoɓi ya̱ wu biti.

5 Tsu ta yuwan yisali,

adama a̱ ma̱za̱nga̱ o lyuwu wa aci a̱ wu,

tsu ta yuwan uje'en na̱ mere,

a̱tsuma̱ a aala a̱ A̱sula̱ a̱tsu.

Lyawa A̱sulazuva a̱ usu,

ipati ya̱ wu suru!

6 Gogo tsunda n reve ta̱,

A̱sulazuva a tsu wawa ta̱ za na u tawai wo o'wo mogono,

u ta̱ usu yi diga zuva va akiza a̱ yi,

waru u ta ca yi a̱ba̱jini a̱ba̱jini o lyuwu wa aci,

nu ucira wu ukere usa'ani wa̱ yi.

7 Ozo o ro a zuwaa ta̱,

ikeke yi ido ucira,

ozo o ro waru a zuwaa ta̱,

ido i le ucira.

Amma a̱tsu, tsu zuwaa ta̱

Ala a̱ A̱sulazuva A̱sula̱ a̱tsu ucira.

8 Amma icu'un ya ama o ndolo a̱ ta̱ ta̱ɗa̱tsa̱ a̱vu a̱ riya̱.

Amma a̱tsu gba tsu ta̱ 'yon tsi isawan nu ukadu.

9 A̱sulazuva,

vu wawa mogono!

Lyawa vu uwwa tsu a mantsa ma na tsu ɗeyi.