1 A̱sulazuva, wawa mu

diga e ekere a̱za̱ e iwuya,

vu yuwaan mu mapari diga e ekere

a̱za̱ o 'ya̱susa̱n wu ugbozu,

2 aza a na oo foɓuso ifoɓi yi iwuya o okolo e le,

a̱ ta̱ ta̱wa̱sa̱ nu uvon mantsa suru.

3 Elentsu e le waru a̱ ta̱ tsi iyo i tsukono,✝

idanshi yi na̱ le fo a̱ ta̱ tsa tsukono tsa apili. Wivuwun

4 A̱sulazuva, vu wawa mu

diga e ekere a̱ a̱za̱ e iwuya,

vu yuwaan mu mapari,

e ekere a̱za̱ o 'ya̱susa̱n ugbozu,

aza a na o foɓoo numu a̱risa̱.

5 Aza a aciyogbamu aa azuwa mu ta̱ maza,

ni igolo i ɗa aa azuwa numu maza,

a̱tsuma̱ o ure aa azuwa mu ta̱ maza

adama e reme mu. Wivuwun

6 N damma ta̱ A̱sulazuva,

<<A̱vu ɗa A̱sula̱ a̱ va̱.>>

A̱sulazuva vu uwwa mesun ma̱ va̱,

vu roco mu iliyali.

7 A̱sulazuva, zagbain,

za vi iwawi i va̱,

za na yuwayin aaci a̱ va̱ a̱a̱ra̱ga̱,

o urana wu uvon.

8 A̱sulazuva, she vu shitowon a̱za̱ e iwuya

ili i na a cigai wan,

She vu lyawa ifoɓi i le i shiwan wan,

ta̱wa̱ a yuwan uvaɗu wan.Wivuwun

9 Lyawa aza a na a̱ ka̱nda̱ruwa̱ numu

addama a na na̱ le ta̱wa̱ a̱ ɓa̱ru le.

10 Lyawa akinkina a madala

o oco a aci e le.

Lyawa a vari le a̱tsuma̱ a akina,

a̱tsuma̱ o oko'o a̱ a̱ru'un uba̱ta̱ u na a̱a̱ da̱shi uta̱ shi.

11 She a̱za̱ o ulungusu wa ala a yuwan ucira

a̱tsuma̱ o uvaɗi wan,

Lyawa iwuya i saɓa aza a na a̱ 'ya̱sa̱sa̱n ugbozu

hali u kototo le.

12 N reve ta̱ A̱sulazuva a ta kamba a̱za̱ o ulambu,

n reve ta̱ u ta yuwan a̱ɓula̱ uba̱ta̱ wa aza a na a cigai ikambishi.

13 Amayun a̱za̱ a̱ a̱ɓula̱ a ta ciɓala ala a̱ wu,

waru aza a na a yuwusan ili i na i ri mejege,

a̱ ta̱ da̱nu a̱ ma̱ka̱ka̱n ma̱ wu.