1 Za na suru 'ya̱wa̱i uba̱ta̱

u Mogono ma̱ A̱sula̱ adama a mapari,

u ta̱ e ivuwan, za̱la̱ vu ululu

u Mogono me ili suru.

2 N ta damma A̱sulazuva,

<<A̱vu ɗa upa'atan

nu uɓaɓu wu ucira u va̱,

a̱vu ɗa A̱sula̱ a̱ va̱,

ya̱'a̱ wu ɗa n zuwai ucira u va̱.>>

3 Amayun u ta wawa wu,

diga a maza ma za vu ugenge,

na̱ mɓa̱la̱ nna ma̱a̱ ta̱wa̱a̱ wu nu ukwisa̱.

4 U ta pala wu ne evelu a̱yi,

za̱la̱ va̱ e evelu a̱yi waru,

vu ta̱ tsura̱ upa'atan.

Waru amayun a̱ yi

a̱ tu uka̱nda̱ruwu na̱ vu,

a yuwusan wu mapari.

5 Vaa uwwa wovon wi ili i wovon i na

i tsu ta̱wa̱ na ayin shi,

ko aya a na a tsu tewin nu urana shi,

6 ko mɓa̱la̱ n na ntsu da̱na̱

aa agara a̱tsuma̱ e irumbu,

ko meleshe ma na ma̱ tsu ta̱wa̱

nu ukototosu nu urana shi.

7 Amma ko na̱ shi ama ukpakukupa

a̱ riya̱ upasu wa̱ wu,

ama ukpakukupa kupa

a̱ riya̱ o ukere u sa'ani wa̱ wu,

babu ili i na yaa rawa zuzu na̱ a̱vu.

8 Amma ne esu a̱ wu a ɗa vee ene,

cine aa ca a̱za̱ e iwuya oforo.

9 Adama a na vo o'wotoi ka̱mba̱toi,

Mogono ma̱ A̱sula̱ uba̱ta̱ wu nden ma̱ wu,

A̱sulazuva waru upa'atan wa̱ wu,

10 babu iwuya i na yaa cina wu,

ko mɓa̱la̱ n ro n na maa rawa

zuzu no oogodo a̱ wu.

11 Adama a na u ta damma

nlingata ma̱ A̱sula̱ adama a̱ wu,✝

a yuwaan wu mapari

e re va̱ wu suru.

12 E te keɗe wu e ekere e le,✝

adama she vu ta̱ɗa̱tsa̱

anana a̱ wu a aatali wan.

13 Vu ta dasa ikamu ni iyo,✝

vu ta dasa ikamu yu ucira,

ni iyo i tsukono.

14 A̱sula̱ a damma ta̱,

<<Adama a na u ri e icigi i va̱,

n ta wawa yi,

n ta yuwaan yi mapari,

adama a na u reve numu.

15 U ta̱ ɗe mu,

agba n ta̱ usu yi,

n ta̱ da̱na̱ oɓolo na̱ a̱yi

a mantsa ma̱ a̱tsuma̱lima̱,

n wawa yi, a̱vu n ca yi tsugbain.

16 N ta ca yi wuma u sa'ani

u na waa jima,

a̱vu n roco yi iwawi i va̱.>>