1 A̱sulazuva, vu cuwan na̱ Da̱wuda,

na̱ a̱tsuma̱lima̱ a na u sowoi suru.

2 U yuwaan ta̱ A̱sulazuva akucunu,

a̱vu waru u yuwan nzuwulai e ekere

a Za vu Ucira wa Yakubu adansa,

3 <<Maa uwa o u'wa u va̱ shi,

ko n von a̱ a̱a̱ga̱da̱ a̱ va̱ shi,

4 maa ca esu a̱ va̱ nlavu shi,

ko mgba̱ɗa̱ a̱ a̱ga̱pa̱na̱ a̱ va̱ shi.

5 She na̱ n tsura̱a̱ A̱sulazuva

uba̱ta̱ u mayan ma̱ a̱ga̱nda̱,

oɓolo nu uba̱ta̱ wu nden adama a Za vu Ucira wa Yakubu.>>

6 A̱tsu a̱tsuma̱ a Efarata tsu uwwa ta̱

aɗa a Akpati a Nzuwulai,✝

reve tsu cina yi ɗe atsusa a Ja'ari.

7 Reve tsu damma,

<<Lyawai tsu 'ya̱wa̱i uba̱ta̱ wu nden wa̱ yi,

lyawai tsu yuwain a̱ga̱nda̱ a̱ ma̱ka̱ka̱n ma̱ yi.

8 'Yon, A̱sulazuva vu ta̱wa̱,

uba̱ta̱ u wivuwun wa̱ wu,✝

a̱vu na Akpati a nzuwulai ma̱ wu

na vu tsu roco ucira wa̱ wu.

9 Lyawa nan ganu a̱ wu

a̱ da̱na̱ wotowu na̱ a̱ɓula̱ tsi itana,

lyawa aza a akiza a̱ wu

a cana ishipa i ma̱za̱nga̱.>>

10 Adama aagbashi a̱ wu Da̱wuda,

she vu vadalaa za na vu tawai urewesu wan.

11 A̱sulazuva a kucinaa ta̱ Da̱wuda,✝

akucunu a amayun a na waa vadala shi u damma,

<<N ta̱ shuwa̱ za ta̱ a̱tsuma̱ a̱ muwun ma̱ wu

o ootogu o tsugono tsa̱ wu,

12 Nna̱ olobo a̱ wu

a̱ guza̱ akucunu a̱ va̱

ni ili i na n zuwai a̱ kuru, na moo rito le,

muwun n le olobo fo

a̱ ta̱ da̱nu ootogu o tsugono tsa̱ wu

hali hali.>>

13 Adama a na A̱sulazuva

a ɗangwa ta̱ Sihiyona,

u yuwan ta̱ maluwa ma na woo o'wo uba̱ta̱ wu nden wa̱ yi.

14 U damma ta̱ fo,

<<A̱yi nda a̱yi ɗa uba̱ta̱ u wivuwun u va̱ hali hali,

lo ɗa ma̱a̱ da̱nu,

adama a na n ta maluwa ma̱ yi.

15 N ta zuwaa Sihiyona aba'un lon,

a̱vu n cuwa̱ton alambi a̱ yi ni ilyalya.

16 N ta wawa nan ganu a̱yi,

a̱za̱ a̱ a̱ɓula̱ a̱yi waru

a̱ ta̱ 'ya̱sa̱n uɗyo u ma̱za̱nga̱.

17 Ɗe ɗa ma̱a̱ da̱shi ucira wa̱ Da̱wuda,

tsa̱ fitila na ri a madala hali hali,

n foɓo ta̱ mogono ma na n tawai.

18 N ta̱ kpa̱to n'yuwatan ma̱ yi na̱ wono,

waru a aaci a̱ yi ɗa maa zuwa

ookokolo o tsugono tse e ikana.>>