1 A̱sulazuva a̱vu ɗa n ri e ipati aatali o upa'atan u va̱!

She vu ulaa mu atsuvu wan.

Adama a na n na̱ vu rungwa̱ kpen,

n to o'wo tsa aza a na

a̱ ka̱ra̱i a̱ tyo a aason.

2 Vu uwwa ipati i va̱

vee ene iliyali i va̱

a mantsa ma na n ɗe nuwu

adama e ikambishi,

a mantsa ma na n 'ya̱sa̱in

e ekere a̱ va̱ a avasa,

a̱ ka̱lyuwusa̱ A̱a̱'isa̱ Akiza a̱ wu.

3 She vu kece mu oɓolo

na̱ a̱za̱ e iwuya wan,

oɓolo na aza a na

a yuwusan iwuya wan,

ama a na adanshi e le

va damma za muwwulai ɗa,

amma okolo e le

tapu ɗa u ri na̱ tsushu'un.

4 Vu tsupa le o una̱ wi ili i na a yuwain,

na̱ o una̱ wi iwuya i na a yuwain fo.

Vu tsupa le o una̱ wu ulinga

u na e ekere e le a yuwain,

a̱vu vu tsupa le ili i na yi ntsaa nle.

5 Ana wo o'woi a tara

ulinga wa̱ A̱sulazuva ili i ro shi

oɓolo ni ili i na e ekere a̱ yi a yuwain shi,

u ta̱ kototo le,

waru wa̱a̱ da̱shi 'ya̱sa̱n le shi.

6 Aba'un za va̱ A̱sulazuva a ɗa,

adama a na wu uwwa ta̱

mesun me izami yi ikambishi i va̱.

7 A̱sulazuva a ɗa ucira u va̱

oɓolo na̱ a̱a̱ra̱ga̱ a̱ va̱,

okolo a̱ va̱

a zuwa ta̱ ucira ya̱ a̱ yi,

waru u kamba mu ta̱.

Okolo a̱ va̱ a yuwan ta̱ ma̱za̱nga̱,

waru n ta̱ godyoo yi

a̱tsuma̱ e ishipa.

8 A̱sulazuva a ɗa ucira

wa a ama a̱yi,

upa'atan wu ucira wi iwawi

adama o mogono ma na u tawai.

9 Lyawa vu wawa a ama a̱ wu,

vu zuwaa a ama agadu a̱ wu aba'un,

vo o'wo za va aguɓa e le,

a̱vu vi idana le hali hali.