1 A̱sulazuva, vu ka̱lyuwa̱ ta̱ okolo a̱ va̱,

waru vu reve mu ta̱.

2 A̱vu ɗa vu revei nden n va̱

nu u u'yosun u va̱,

waru vu tsu reve ta̱ majiyan ma̱ va̱ diga alanga.

3 Vu tsi idana ta̱ mmalu n va̱,

vu reve ta̱ na̱ wu utusa̱ u va̱,

na̱ nven n va̱ suru.

4 Babu na adanshi o uta̱i o una̱ u va̱, A̱sulazuva,

vu reve ta̱ ɗe na̱ a̱yi suru.

5 Vu tsu ka̱nda̱ruwa̱ mu ta̱ elime na̱ a̱ca̱pa̱,

reve vu yuwaan mu mapari nu ukere wa̱ wu.

6 Cu'un vu urevu u ndolo

u la'a ta̱ ucira u va̱,

ili yu usokowu wa̱ a̱ru'un a ɗa

a na u la'ai urevu u va̱.

7 Te ɗa mee tyo n sumaa Ruhu va̱ wu?

Te ɗa mee tyo m pa'an urewesu wa̱ wu?

8 Na̱ n kumba a gawan zuva, vu ta̱ ɗe.

Na̱ m polo aavalu a̱ va̱

e iɗa uba̱ta̱ wa̱ a̱kwa̱kwa̱, vu ta̱ pe.

9 Ko na̱ mu 'yawan na̱ wasasa,

reve n da̱nu o ukosu u mala,

10 ko ɗe'e fo ukere wa̱ wu u ta̱ kuru na̱ a̱mu,

ukere usa'ani wa̱ wu u ta̱ guza̱ mu ugbamu.

11 Nna̱ n damma,<<Amayun irumbu i ta̱ ɓa̱ru mu,

ekan a na a̱ ri uka̱nda̱ruwu na̱ a̱mu o o'wo ta̱ ayin,>>

12 Ko irumbu'u gba irumbu i ɗa e ekere a̱ wu shi,

waru ayin e te ikanasa tsu urana,

adama a na irumbu ne ekan ili i ta̱ i ɗa e ekere a̱ wu.

13 A̱vu ɗa vu yuwain ili ya̱ a̱a̱tsuma̱ i va̱,

vu ɓolulo numu a̱ a̱a̱tsuma̱ a mma va̱.

14 N ta ciɓalasa wu,

adama a na cine vu yuwan numu ili i wovon i ɗa ni ili ya asalama.

Linga va̱ wu ili ya asalama i ɗa,

n reve ta̱ na̱ ele ulobonu.

15 Uruma u va̱ u ri usokowu e ekere a̱ wu shi,

mantsa ma na a yuwan numu usokowu,

a mantsa ma na a rumusa mu a̱tsuma̱ a̱ a̱ru'un o uvaɗi.

16 Esu a̱ wu e ene ta̱ pasu lipu va̱

kafu a shiwan.

A̱tsuma̱ aatagada a̱ wu a ɗana ta̱

a̱bunda̱ a rana na o foɓoi adama a̱ va̱,

kafu ko za ta̱ a̱tsuma̱ le o o'wo.

17 A̱sula̱, majiyan ma̱ wu

adama a̱ va̱ a̱ ri ni iroci shi!

A gura kece le shi.

18 Na̱ maa gura kece le

a ta la'a wuyun a̱bunda̱.

Mantsa ma na n juwain

n to oɓolo na̱ a̱vu waru.

19 A̱sula̱, na̱ shi de a damma

vu ta̱ kototo a̱za̱ e iwuya

aza a na a cigai wocosu wu mpasa waru

a kasa na̱ a̱mu.

20 Aza a na a yuwusan adanshi

e iwuya a aci a̱ wu,

n'yuwatan ma̱ wu aza a na a yuwusan adanshi,

a avama adama ala a̱ wu.

21 A̱sulazuva, maa 'yuwusan

aza a na a 'yuwan nuwu shi?

Waru maa uwwusa upan wa aza a na

aa yuwusan nla̱ngi na̱ a̱vu shi?

22 N 'yuwan le ta̱ suru suru,

na amayun n tara le ta̱ n'yuwatan n va̱.

23 Gbangaɗa mu A̱sula̱,

vu ta̱ reve okolo a̱ va̱,

lyungwa̱ mu, vu ta̱ gba reve

majiyan ma̱ va̱.

24 Vu ka̱lyuwa̱ ve ene,

ko ure wi iwuya i ro

i ta̱ pe a̱tsuma̱ a̱ va̱,

vu toni na̱ mu o ure

u wuma u na u ri hali hali.