1 A̱sulazuva ya̱'a̱ wu ɗa,

maa zuwusa okolo a̱ va̱.

2 A̱sula̱ ya̱'a̱ wu ɗa

n zuwai ucira u va̱.

She vu lyawa mu uwwa wono wan,

ko vu lyawa n'yuwatan n va̱,

n lyuwa a aci a̱ va̱ wan.

3 She vu lyawa za na zuwai okolo a̱yi,

ya̱'a̱ wu uwwa wono wan.

Amma lyawa aza a yipaalishi,

a uwwa wono.

4 A̱sulazuva vu roco mu re va̱ wu,

waru vu rito mu aɗa a̱ wu.

5 Vu toni na̱ a̱mu

o ure wa amayun a̱ wu,

waru vu rito mu.

Adama a na a̱vu ɗa A̱sula̱

za vi iwawi i va̱,

u zuwu o okolo a̱ va̱

a̱ ta̱ ya̱'a̱ wu mantsa suru.

6 A̱sulazuva vu cuwan ni iliyali ya̱ wu

ni icigi ya̱ wu i na i tsu vadala shi,

aza a na vu yuwain ɗe.

7 She vu cuwan na̱ nusu

tsulolobo tsa̱ va̱

na̱ re va aciyogbamu a̱ va̱ wan,

vu cuwan na̱ a̱mu,

o una̱ wi icigi ya̱ wu i na i tsu vadala shi,

adama a na a̱vu za vi isa'ani ɗa.

8 A̱sulazuva za va̱ a̱ɓula̱ ni isa'ani ɗa,

u tsu roco ta̱ ozo o unusu

ure u na o toni.

9 U tsu toni ta̱

na aza a na a tarai aciyele

ili i ro shi

a̱tsuma̱ e ili i na iri mejege

reve u roco le re va̱ yi.

10 Re va̱ A̱sulazuva suru,

icigi i ɗa i na i tsu vadala shi na̱ a̱ɓula̱,

e ekere aza a na a toniyi

udammu na̱ nzuwulai ma̱ yi.

11 A̱sulazuva, adama aala a̱ wu

vu yuwaan mu gafura vu unusu u va̱,

ko na wo o'woi a̱ ta̱ a̱bunda̱ lon.

12 Zane ɗa vuma na

a uwwusa wovon wa̱ A̱sulazuva?

U ta̱ roco yi ure u na woo toni.

13 Mantsa suru u ta̱ da̱na̱

na asuvu nden

waru muwun ma̱ yi

n to o'wo na agadu e iɗa'a.

14 A̱sulazuva i'utsa̱ ya aza a na

a uwwusa wovon wa̱ yi u ɗa,

u tsu lyawa le ta̱

e reve nzuwulai ma̱ yi.

15 Esu a̱ va̱ a̱ ta̱ kuci

uba̱ta̱ wa̱ A̱sulazuva,

adama a na a̱yi ɗa

u tsu wawa mu a̱tsuma̱ e meleshe.

16 Vu vadala a̱ tyo ya̱'a̱ va̱,

vu yuwaan mu isa'ani,

adama a na a̱mu ɗa a̱ nde'en,

waru a 'yuwan mu ta̱.

17 A̱tsuma̱lima̱ a̱ va̱ a̱ da̱shi ta̱,

vu uta̱a̱ mu

a̱tsuma̱ a̱ a̱tsuma̱lima̱ a̱ va̱ suru.

18 Vi idana a̱tsuma̱lima̱ a̱ va̱

na addama a̱ va̱,

vu yuwaan mu gafura

vu nusu va̱ suru.

19 Ka̱lyuwa̱ cine n'yuwatan n va̱

n da̱shiyi a̱bunda̱,

na̱ cine a̱ ima̱ numu lon!

20 Vu geshe wuma u va̱!

Reve vu wawa mu!

She vu lyawa mu,

mu uwwa wono wan!

Adama a na a̱vu ɗa upa'atan u va̱!

21 Lyawa a̱ɓula̱ na amayun,

a̱ geshe mu,

adama a na ya̱'a̱ wu ɗa

maa zuwusa okolo a̱ va̱.

22 A̱sula̱ vu wawa aza a Isra'ila,

a̱tsuma̱ a̱ a̱tsuma̱lima̱ e le suru.