1 N ta cuwa A̱sulazuva mantsa suru,

ica ya̱ yi i ta̱ da̱na̱ o una̱ u va̱ mantsa biti.

2 Wuma u va̱ u ta cuwa A̱sulazuva,

lyawa aza a na a̱ ri nu ucira shi,

a uwwa a yuwan ma̱za̱nga̱.

3 I ca A̱sulazuva tsugbain oɓolo na̱ a̱mu,

lyawai tsu cayi aala a̱yi tsugbain oɓolo!

4 M pati ta̱ A̱sulazuva,

reve u usu mu,

reve wu uta̱a̱ mu

a̱tsuma̱ o wovon u va̱ suru.

5 Za na aa zuwusa esu ya̱'a̱ yi,

urewesu wa̱ yi wa̱ da̱na̱ ulukutu shi

adama a̱ ma̱za̱nga̱,

waru wono wa̱ uɓa̱ru yi shi.

6 Za vu ulambu ɗe ta̱,

a̱vu A̱sulazuva a̱ usu yi,

reve u wawa yi

a̱tsuma̱ addama a̱ yi suru.

7 Malingata ma̱ A̱sula̱ ma̱ ta̱ e ipiri

ma aza a na a uwwusa wovon wa̱ A̱sulazuva,

reve u wawa le diga meleshe suru.

8 I peɗe yee ene na aciya̱ɗu A̱sulazuva a̱ tu ulobonu,✝

za ma̱za̱nga̱ ɗa,

za na tsura̱i upa'atan uba̱ta̱ wa̱ yi.

9 Yu uwwa wovon wa̱ A̱sulazuva,

a̱ɗu ama a akiza a̱ yi,

adama a na aza a na a uwwusa

wovon wa̱ yi a tsu lamba ili shi.

10 Ko ikamu i tsu lamba ta̱ ilyalya

reve a uwwa ambulu,

amma aza a na aa zamishi A̱sulazuva,

a tsu lamba ili isa'ani shi.

11 Ta̱wa̱i muwun n va̱,

i poloo mu atsuvu,

n to roco ɗu

cine ya uwwa wovon wa̱ A̱sulazuva.

12 Zane ɗa cigai wu uwwa uyo'o u wuma?✝

Zane ɗa cigai we ene rana sa'ani va̱ a̱bunda̱?

13 To, she u guza̱ una̱ wa̱ yi

a adanshi e iwuya

na adanshi e epen.

14 U lyawa iwuya u yuwan isa'ani,

u zami asuvu nden no okolo a̱yi suru.

15 Esu a̱ A̱sulazuva a̱ ta̱ a aci a̱za̱ a̱ a̱ɓula̱,

atsuvu a̱yi waru a ta uwwusa mesun me le.

16 Urewesu wa̱ a̱ A̱sulazuva,

u ta a aci aza a na a yuwusan iwuya,

adama a tawa,

aɗa e le a̱tsuma̱ o uvaɗi.

17 A̱za̱ a̱ a̱ɓula̱ a̱ tsu shon ta̱,

a̱vu A̱sulazuva a uwwa le,

u tsu wawa le ta̱ a̱tsuma̱ a addama le suru.

18 A̱sulazuva a̱ ta̱ zuzu,

na aza na a kuɗai okolo ele,

u tsu kamba ta̱ aza a na o uta̱yi okolo.

19 A̱tsuma̱lima̱ a za va̱ a̱ɓula̱ a̱ ta̱ a̱bunda̱,

agba A̱sulazuva a tsu wawa yi ta̱,

a̱tsuma̱ ele suru.

20 U tsu ka̱lyuwusa̱ le ta̱ suru,

babu eetele a̱ ta̱ a na aa kuɗa.

21 Iwuya i ta̱ o una za vi iwuya,

waru a̱ ta̱ ge'eto aza a na a 'yuwain a̱za̱ a̱ a̱ɓula̱.

22 A̱sulazuva a tsu wawa ta̱ agbashi a̱yi,

aza a na a zamiyi upa'atan uba̱ta̱ wa̱ yi,

a̱ da̱na̱ nu unusu shi.