1 Vu cuwa A̱sulazuva,

wuma u va̱!

A̱sulazuva A̱sula̱ a̱ va̱,

zagbain ɗa vu ri lon,

vu ta̱ wupalu na̱ tsugbain na̱ a̱ɓula̱.

2 A̱sulazuva a pala ta̱ aciya̱yi ne ekan

cine vu revei umuna,

wu ba̱ruwa̱ ta̱ zuva va zuva

cine vu revei oogodo,

3 u shuwa̱ ta̱ ikyun yu usaa

wu u'wa wa̱ yi zuva mini.

U ka̱mba̱to ta̱ eleshe

keke vi ido yu uvon ya̱ yi

a kumbusa e evelu o upepu.

4 U ka̱mba̱to ta̱ upepu o'wo ajiya a̱ yi,

elentsu a akina waru nlingata ma̱ yi.

5 U shuwa̱ ta̱ uvaɗi e ikyun ya̱ yi,

wa̱a̱ jinga̱ɗa̱ shi.

6 Vu zuwa ta̱ mala

ma pala uvaɗi tsu umuna,

reve mini ma̱ da̱nu

zuva vu nsasan.

7 Amma tsuɓari tsa̱ wu tsa zuwa ta̱ a suma,

ana a uwwai uɗyo u tsata tsa̱ wu

ɗaɗa a sumai,

8 a kumbai a nsasan,

reve a̱ cipa̱ a̱ tyo o uka̱ri,

uba̱ta̱ u na vu foɓoo nle.

9 Vu zuwaa le ta̱ utyo u na a pasa shi,

tsa̱ra̱ a̱ da̱shi ta̱wa̱ a pala uvaɗi wan.

10 Vu zuwa ta̱ esu a̱ mini o o'wo ɗolu,

e yeneshe e memere ma nsasan.

11 A ta casu inama yu una suru mini,

ɗe ɗa nloli mu una n tsu tawa akuli e le.

12 Nnunu ma zuva n tsu yuwan ta̱

nkinda zuzu na̱ mini'i,

reve a̱ da̱na̱ a canasa ishipa ɗe e eten.

13 Diga ɗe zuva

uba̱ta̱ wu nden ma̱ wu u ɗa,

vaa casu nsasan mini,

waru uvaɗi u tsu shiwan ta̱

na aba'un a̱ wu.

14 Vu tsu zuwa ta̱ anlya a kungwa

adama e iliyamunga,

ototopi adama a vuma,

tsa̱ra̱ u tsura̱ ilyalya o uvaɗi,

15 oɓolo na̱ masayan ma na

ma tsu zuwa okolo ma̱za̱nga̱,

na̱ mani'in adama u zuwa

urewesu wa̱ yi u dala,

no opopofu a na aa ca yi ucira.

16 Ɗanga va̱ A̱sulazuva a̱ tsura̱ ta̱ mini lon,

ɗanga sida va Lebanon na u shuwa̱i.

17 Uba̱ta̱ u na nnunu

n tsu yuwan nkinda n le,

aashamuwa a̱ ta̱ na̱ 'wa le

a ɗanga fir.

18 Zuva vu nsasan mu uga'an n ɗa

mgbele mu una n tsu da̱nu,

a̱ba̱nu waru adama a magima

a̱ tsura̱ upa'atan.

19 Vu zuwa ta̱ woto

tsa̱ra̱ vu roco mantsa,

waru urana u reve ta̱

mantsa ma na wa̱a̱ riya̱.

20 Vu yuwan ta̱ irumbu, wo o'wo ayin

mantsa ma na inama yu una i tsu uta̱ igaru.

21 Ikamu i tsu gugwa̱ ta̱ na̱ o uta̱

igaru yi izami yi ilyalya,

a zamishi ilyalya i le

diga uba̱ta̱ wa̱ A̱sula̱.

22 Nu usana u tawa,

reve a̱ ka̱mba̱ o von a̱ a̱a̱ka̱ri

uba̱ta̱ u na a̱ tsi ivuwan.

23 Vaɗilima̱ tsu uta̱ ta̱

u 'ya̱wa̱ uba̱ta̱ o ulinga wa̱ yi,

u yuwan ulinga wa̱ yi hali ulivu.

24 A̱sulazuva, vu yuwan ta̱

ili ya̱ a̱bunda̱!

Nu ugbozu wa̱ a̱bunda̱ u ɗa vu yuwan nle.

Uvaɗi u ta̱ tapu

ni ili i na vu yuwain.

25 Apa uɗolu u washin wa̱ a̱ru'un

tapu ni ili i wuma i mini ya̱ a̱bunda̱

na ri n kece shi,

aza a wuma,

aza a gbagbain na̱ muwun.

26 Nlo antsun a̱ mini,

aza a na a̱ 'ya̱wusa̱ na̱ a̱ ta̱wi.

Nlo a̱a̱dodo Leviyatan✝ na vu yuwain

tsa̱ra̱ u yuwan uro a̱tsuma̱ a̱ mini.

27 A ta zuwusaa wu ucira suru

tsa̱ra̱ a̱ tsura̱ ilyalya

a mantsa ma na a cigai.

28 Na̱ vu ca le o tsu ɓoloto ta̱,

na̱ vu kpa̱tu'wa̱ ekere a̱ wu,

reve a̱ cuwa̱n ulobonu.

29 Na̱ vu soko urewesu wa̱ wu

a tsu uwwa ta̱ wovon lon,

na̱ vu tawa wivuwun u le,

a̱ tsu kuwa̱ ta̱

reve a̱ ka̱mba̱ ma̱buta̱.

30 Amma a mantsa ma na vu zuwaa nle wivuwun

a̱ tsu tsura̱ ta̱ wuma,

vu tsu lapula ta̱

urewesu wu uvaɗi.

31 Lyawa tsugbain tsa̱ A̱sulazuva

tsa̱ da̱na̱ lo hali hali,

lyawa A̱sulazuva a yuwan

ma̱za̱nga̱ a linga va̱ yi.

32 Za na tsu ka̱lyuwa̱ uvaɗi

a̱vu u jinga̱ɗa̱,

za na tsu ju'wa̱n nsasan

a̱vu o uta̱ mikyon.

33 N ta canaa A̱sulazuva ishipa

a wuma u va̱ suru,

na̱ n ri wuma n ta canaa A̱sula̱ a̱ va̱

ishipa yi ica.

34 Lyawa majiyan ma̱ va̱

ma zuwa yi ma̱za̱nga̱,

adama n yuwan mere

uba̱ta̱ wa̱ a̱ A̱sulazuva.

35 Lyawa a̱za̱ o unusu

a̱ puwa̱n a̱tsuma̱ o uvaɗi

waru a̱a̱ da̱shi ee ene a̱za̱ e iwuya wan!

Vu cuwa A̱sulazuva,

wuma u va̱.

Cuwa A̱sulazuva!