1 Vu uwwa tsu, a̱vu Za va Aguɓa a Isra'ila,

a̱vu na vu ronoi ugundo wa̱ Isuhu aɗanga cine vu revei oɓolo e ikyon.

A̱vu na vu ri nden e memere ma nan kerobobi vu ca ekan.✝

2 Vu ca ugundo wa Ifiramu na̱ Banyami na̱ Manase ekan a̱ wu!

Vu 'ya̱sa̱n ucira wa̱ wu vu ta̱wa̱ vu wawa tsu.

3 A̱sula̱, vu ka̱mbuwa̱ tsu,

vu zuwa urewesu wa̱ wu wi ikana tsu

adama tsu tsura̱ iwawi!

4 A̱sulazuva A̱sula̱ o oɓolo a̱ a̱soja a zuva,

hali mantsa ma̱ ne ma ɗa va̱a̱ da̱na̱ o upan

na avasa a ama a̱ wu?

5 Vu lyuwato le ta̱ opopofu a aɓara,

vu zuwa le ta̱ o sowo aɓara a̱ a̱ba̱jini a yanda.

6 Vu zuwa ta̱ nron mu nden n tsu,

a yuwan nla̱ngi adama e iɗa i tsu,

a̱vu n'yuwatan n tsu n yuwaan tsu ulamu.

7 Ka̱mba̱to tsu, A̱sula̱ o oɓolo a̱ a̱soja a zuva

lyawa urewesu wa̱ wu wi ikana tsu

adama tsu tsura̱ iwawi.

8 A̱vu ɗa vu uta̱a̱ ntsu, a̱tsu ataci a inabi a̱tsuma̱ a Masar,

reve vu loso nɗa a̱vu vu shuwa̱ tsu.

9 Vu lapula ta̱ uba̱ta̱ adama a̱ tsu

reve tsu yuwan aralu tsu shiton iɗa'a.

10 Ululu wa ataci'i u pala ta̱ nsasan,

na̱ ɗanga gbagbain sida na ataci a̱ yi.

11 Ataci a̱ yi a̱ ba̱ruwa̱ ta̱ a̱ tyo a Mala ma Gbain,

hali fo a̱ tyo o Uɗolu wa̱ Yufireti.

12 Adama a̱ nye a ɗa vu ɓosoi ɓaɓu va̱ yi,

tsa̱ra̱ aza a na a̱ ka̱ra̱sa̱ lo a taɓa umatsun wa̱ yi?

13 Ijima i lungususa̱ ta̱ ataci'i,

waru inama yu una i ta tamusa a̱ yi.

14 A̱sula̱ o oɓolo a̱ a̱soja a zuva, vadala uba̱ta̱ u tsu!

Vu ka̱lyuwa̱ diga zuva vu kamba ataci a nda,

15 aralu a na ukere wu ucira wa̱ wu u shuwa̱i,

mataci ma na vu kungwatoi adama a aciya̱wu.

16 O koɗo ta̱ ataci a̱ wu a̱ kula̱to yi na akina,

vu roco upan wa̱ wu vu kototo le.

17 Lyawa ukere wu ucira wa̱ wu u da̱na̱ a vuma na vu ɗangwai,

mawun ma vuma ma na vu kungwatoi adama aciya̱wu.

18 Adama o ndolo tsaa vadalaa wu ucina̱ shi.

Vu cayisa tsu ucira, tsu ta̱ gba ɗe ala a̱ wu.

19 A̱sulazuva A̱sula̱ o oɓolo a̱ a̱soja a zuva, vu ka̱mba̱to tsu,

lyawa urewesu wa̱ wu wi ikana tsu

adama tsu tsura̱ iwawi.