1 A̱sulazuva, vu uwwa mu, a̱vu vu usu mu

adama a na a̱mu za vu ulambu ɗa za na cigai ikambishi.

2 Vu wawa wuma u va̱,

adama a na n ca ta̱ aciya̱va̱ ya̱'a̱ wu.

A̱vu ɗa A̱sula̱ a̱ va̱, vu wawa aagbashi a̱ wu,

zana zuwai ucira wa̱ yi ya̱'a̱ wu.

3 A̱sulazuva, ene iliyali i va̱,

adama a na n ɗewu wu ta̱ urana ma̱ɓula̱.

4 Ta̱wa̱a̱ aagbashi a̱ wu, na̱ ma̱za̱nga̱,

adama a na avasa a̱ va̱ a gawan ta̱ ya̱'a̱ wu.

5 A̱sulazuva, a̱vu za na tsu yuwusan gafura ɗa

na̱ mayan me isa'ani, ni icigi ya̱ a̱bunda̱,

a̱ tyo uba̱ta̱ wa aza a na e ɗesu ya̱ a̱ wu.

6 A̱sulazuva, vu uwwa avasa a̱ va̱,

vu uwwa mesun me izami yi ikambishi i va̱.

7 A mantsa ma̱ a̱tsuma̱lima̱ n ta̱ ɗe wu,

adama a na vu ta uwwa mu.

8 A̱sulazuva, a̱tsuma̱ a̱ musula̱ babu tsa̱ wu,

babu linga na ri lo na a kurato na̱ linga va̱ wu.

9 A̱sulazuva, nɗa nna vu yuwain suru,

a̱ ta̱ ta̱wa̱ a̱ kingyo a yuwaan wu a̱ga̱nda̱,

a ta ca a ala a̱ wu tsugbain.

10 Adama a na a̱vu zagbain ɗa,

waru vu yuwan ta̱ linga va asalama,

a̱vu ɗa goon A̱sula̱.

11 A̱sulazuva, rito mu ure wa̱ wu,

adama n wala a̱tsuma̱ amayun a̱ wu.

Ca mu okolo a̱ ta̱,

tsa̱ra̱ mu uwwa wovon wa aala a̱ wu.

12 A̱sulazuva A̱sula̱ a̱ va̱, n ta yuwaan wu ica no okolo a̱ va̱ suru,

n ta ca aala a̱ wu tsugbain hali hali.

13 Adama a na icigi ya̱ wu i na i tsu vadala shi, e ekere a̱ va̱ u ta̱ a̱bunda̱.

Vu wawa ta̱ wuma u va̱, diga a̱ru'un

o uba̱ta̱ wu nden ma̱ a̱kwa̱kwa̱.

14 A̱sula̱, aza aciyogbamu a̱ 'ya̱sa̱a̱n mu ta̱,

o oɓolo aza a na a̱ tse ene iliyali shi,

a̱ ta̱ e izami i wuma i va̱,

aza a na a tara nuwu ili shi.

15 Amma a̱vu, A̱sulazuva, A̱sula̱ a ɗa za vi iliyali ni isa'ani,

vu tsu yuwan upan go'o shi,

za vi icigi ya̱ a̱bunda̱ na amayun.

16 Vu vadala a̱ ta̱wa̱ uba̱ta̱ u va̱ vu yuwaan mu isa'ani,

vu ca aagbashi a̱ wu ucira,

a̱vu vu wawa ulobo wa aagbashi a ka va̱ wu.

17 A̱sulazuva vu roco mu iroci yi isa'ani ya̱ wu,

tsa̱ra̱ n'yuwatan n va̱ ene a uwwa wono,

adama a na a̱vu ɗa vu kamba numu

a̱vu vu ca mu adanshi.