1 Vu cuwa A̱sulazuva,

wuma u va̱!

Ili i na i ri a̱tsuma̱ a̱ va̱ suru,

i cuwa ala a akiza a̱ yi.

2 Vu cuwa A̱sulazuva,

wuma u va̱!

Vi icina ni isa'ani ya̱ yi wan,

3 za na yuwaan nuwu gafura vu nusu va̱ wu suru,

reve u yuwaan wu opocino a banakun va̱ wu.

4 Za na wawai wuma wa̱ wu diga a̱ a̱a̱ka̱ri o ukwa̱,

reve u katala wu no okokolo e icigi ni iliyali.

5 Za na cuwa̱ton nuwu ni ili i sa'ani

adama a̱ ka̱mba̱to ucira wa̱ wu

tsa̱ a̱a̱kuru.

6 A̱sulazuva a ta yuwusan ulinga wa̱ a̱ɓula̱ na amayun

e ekere aza a na a tsutsugbusa.

7 U lyawa ta̱ Musa reve re va̱ yi,

linga va̱ yi waru uba̱ta̱ wa aza a Isra'ila.

8 A̱sulazuva a̱ ta̱ tapu

ni iliyali ni isa'ani,✝

u tsu yuwan upan keɗu shi,

o rocosu icigi ya̱ yi

i na i tsu vadala shi.

9 U tsu ɓarasa mantsa suru shi,

waru wa̱a̱ da̱na̱ a yuwusan upan hali hali shi.

10 U ca tsu oforo wuntsa wu na̱ nusu tsu shi,

ko u tsupa tsu o una̱ wu nusu na tsu yuwain shi.

11 Adama a na cine vu revei zuva ri alanga ni iɗa,

ne ɗa icigi ya̱ yi i na i tsu vadala shi i ri mgbain

e ekere aza a na a uwwusa wovon wa̱ yi.

12 Cine vu revei asana a̱ ri alanga na̱ a̱livu,

ne ɗa waa tawusa nusu tsu alanga na̱ a̱tsu.

13 Cine dada tse ene iliyali i mawun ma̱ yi,

ne ɗa A̱sulazuva e enishe iliyali

ya aza a na a uwwusa wovon wa̱ yi.

14 U reve ta̱ cine tsu ri,

u tsu cuwan ta̱ a na a̱tsu ma̱buta̱ ma ɗa.

15 Rana vu vaɗilima̱,

ta̱ tsa anlya,

u tsu bala ta̱ tsa yipa̱lu ya atsusa,

16 upepu u tsu lapa yi ta̱ a̱vu u puwa̱a̱n,

a̱a̱ da̱shi ene iroci ya̱ yi shi.

17 Amma icigi ya̱ A̱sulazuva

i na i tsu vadala shi

u ri nu ukotu shi

uba̱ta̱ wa aza a na a uwwusa wovon wa̱ yi.

A̱ɓula̱ a̱ yi waru a̱ tyo

uba̱ta̱ u muwun n tsukaya n le,

18 aza a na a yuwusan tsutoni na̱ wila̱ wa̱ yi

reve a cuwan a yuwan ili i na u dammai.

19 A̱sulazuva a̱ shuwa̱ ta̱

ootogu o tsugono tsa̱ yi zuva,

reve tsugono tsa̱ yi

tsa yuwusan tsugbain tsi ili suru.

20 I cuwa A̱sulazuva,

a̱ɗu nlingata ma̱ A̱sula̱,

a̱ɗu na i ri nu ucira,

aza a na a yuwusan ili i na u cigai,

a yuwusan tsutoni na adanshi a̱ yi.

21 I cuwa A̱sulazuva,

a̱ɗu oɓolo a a̱soja a zuva suru,

a̱ɗu agbashi a̱ yi,

aza a na aa yuwusan ili i na u dammai.

22 I cuwa A̱sulazuva

a̱ɗu linga va̱ yi a̱tsuma̱ o tsugono tsa̱ yi suru.

Vu cuwa A̱sulazuva wuma u va̱.