1 Uvaɗi ma̱ɓula̱ i yuwaan A̱sula̱ yorori i ma̱za̱nga̱!

2 I cana ishipa i tsugbain a̱ tyo ala a̱ yi,

i zuwa ica ya̱ yi i da̱na̱ na̱ tsugbain!

3 I damma A̱sula̱,

<<A te ɗa iroci yi linga wovon va̱ wu ya asalama!

Ucira wa̱ wu u ta̱ mgbain lon,

hali na n'yuwatan ma̱ wu n tsu kingyo

elime a̱ wu na̱ wovon!

4 Uvaɗi ma̱ɓula̱ a̱ kingyo ta̱ elime a̱ wu

a canasa wu ishipa yi ica,

a canasaa a ala a̱ wu ishipa yi ica.>> Wivuwun

5 Ta̱wa̱i ye ene ili i na A̱sula̱ a yuwain,

linga wovon va asalama a̱ yi

aza a na u yuwain e ekere a vaɗilima̱.

6 U ka̱mba̱to ta̱ mala iɗa yu u'yewu,✝

a̱vu ama a pasa uɗolu'u na ana,

lyawa tsu yuwain ma̱za̱nga̱ a̱tsuma̱ a̱ yi.

7 U ta yuwusan tsugbain tsa babu ukotu

o una̱ wu ucira wa̱ yi,

esu a̱ yi a̱ ta̱ a̱ a̱ka̱nla̱ a nɗa,

tsa̱ra̱ a̱za̱ o ugbawu

a cuwa aciyele wan. Wivuwun

8 I cuwa A̱sula̱ a̱ tsu, a̱ɗu ama suru!

Lyawa a uwwa uɗyo wi ica ya̱ yi.

9 A̱yi ɗa za na e idanai wuma u tsu,

waru wi idanai ana a̱ tsu a na e derece.

10 Adama a na a̱vu A̱sula̱ vu lyungwa̱ tsu ta̱,

reve vo o'woto tsu cece tsa azurufa.

11 Vu ta̱wa̱to tsu ta̱ o u'wa wa ali,

a̱vu vu zuwaa tsu

itana yu ume a̱ cina̱ tsu.

12 Vu lyawa ta̱ ama a kumba aaci a̱tsu,

tsu kuru ta̱ a̱tsuma̱ a akina na̱ mini,

amma a̱vu vu ta̱wa̱to tsu

uba̱ta̱ wu utsuru wa̱ a̱bunda̱.

13 N ta̱ ta̱wa̱ o u'wa wa̱ wu

na̱ kucci vu ukula̱tosu

reve n shiton nzuwulai

n na n yuwain uba̱ta̱ wa̱ wu,

14 nzuwulai n na elentsu a̱ va̱ a yuwain,

na̱ za na una̱ u va̱ u dammai

a mantsa ma na n da̱na̱i a̱tsuma̱ a̱tsuma̱lima̱.

15 N ta ca kucci va a̱ba̱jini

e iliyamunga uba̱ta̱ wa̱ wu,

oɓolo na̱ kucci va̱ a̱a̱giri'i

n ta ca ogono e inan na̱ nga̱ji. Wivuwun

16 Ta̱wa̱i i zuwa atsuvu,

a̱ɗu na yaa uwwusa wovon wa̱ A̱sula̱,

lyawa n damma ɗu

ili i na u yuwaan numu.

17 N showen yi ta̱ nu una̱ u va̱,

waru ica ya̱ yi i ta̱ eelentsu a̱ va̱.

18 Na̱ shi adamma mu uwwa ta̱ uyo'o

wu unusu o okolo a̱ va̱,

A̱sulazuva a̱ shi a zuwaa mu atsuvu shi.

19 Amma na amayun

A̱sula̱ a uwwa mu ta̱,

wu uwwa ta̱ uɗyo wa avasa a̱ va̱.

20 Ica a̱ tyo uba̱ta̱ wa̱ A̱sula̱,

za na 'yuwain avasa a̱ va̱ shi,

ko u tawa icigi ya̱ yi i na i tsu vadala shi

a̱ tyo ya̱'a̱ va̱!