1 A̱sula̱ a ɗa uba̱ta̱ wu upa'atan

u tsu nu ucira u tsu,

ufoɓu u ɗa u ri tsa̱ra̱ u kamba tsu

a mantsa ma̱ a̱tsuma̱lima̱ suru.

2 Adama o ndolo tsa uwwa wovon shi,

ko na̱ shi uvaɗi u jinga̱ɗa̱,

ko na̱ shi atali a̱ riya̱ a mala,

3 ko na̱ shi mala ma̱ puna̱ a̱vu u gugwa̱,

ko na̱ shi nsasan n je'en

adama a na iɗa i jinga̱ɗa̱i.

4 Uɗolu u tu lo na wa̱a̱ ta̱wusa̱a̱

lyuci va̱ A̱sula̱ na̱ ma̱za̱nga̱,

nu uba̱ta̱ wa akiza a na

Mogono ma̱ A̱sula̱ ma̱ ri nden.

5 A̱sula̱ a̱ ta̱ pe e memere ma̱ lyuci'i,

aa gura kototo yi shi.

A̱sula̱ a ta kamba yi

nu usana u tawa.

6 Nɗa mu uwwa ta̱ wovon,

tsugono tsu da'wan ta̱ fo.

Ana A̱sula̱ a yuwain tsata,

uvaɗi wu jeruwe ta̱.

7 A̱sulazuva o oɓolo a̱ a̱soja a zuva

o to oɓolo na̱ a̱tsu,

A̱sula̱ a Yakubu a̱yi ɗa

uba̱ta̱ wu upa'atan wu ucira u tsu.

8 Ta̱wa̱i ye ene ili i na A̱sulazuva a yuwain,

ka̱lyuwa̱i ili ya asalama a na

u yuwain a̱tsuma̱ o uvaɗi!

9 Wi isawaton ta̱ uvon o uvaɗi ma̱ɓula̱,

a kuɗusa tan nu lungususai ibata,

a̱ kula̱tosu a̱ra̱ga̱ na akina.

10 A̱vu A̱sula̱ a damma, <<Isawan yi kpen,

tsura̱ i reve a̱mu ɗa A̱sula̱.

A ta ca mu tsugbain a̱tsuma̱ a nɗa,

a ta ca mu tsugbain a̱tsuma̱ o uvaɗi.>>

11 A̱sulazuva o oɓolo a̱ a̱soja a zuva

o to oɓolo na̱ a̱tsu,

A̱sula̱ a Yakubu a̱yi ɗa

uba̱ta̱ wu upa'atan wu ucira u tsu.