1 Nye i zuwai nɗa

m ɓoloi a̱ 'ya̱sa̱in aci?✝

Nye i zuwai e elentsu

a yuwusan ifoɓi ye pere?

2 Nye i zuwai ngono mu uvaɗi

o foɓoi uvon?

Nye i zuwai a̱za̱ a̱ tsugono

o ɓoloi aci,

a yuwusan tsushu'un na̱ A̱sulazuva

oɓolo na̱ mogono ma na u tawai?

3 Adansa,

<<Lyawa tsu uta̱a̱ aciya̱tsu diga o tsugono tsa̱ ele,

na̱ tsugono tsa̱ A̱sulazuva

oɓolo na̱ mogono ma na u tawai,

tsu fa̱tsa̱ e ekere ele.>>

4 Amma A̱sulazuva o zo'oso le ta̱,

diga Ootogu o tsugono tsa̱ yi ɗe zuva.

Reve u zuwa le o o'wo ili yu ulamu.

5 Reve u ɓara le nu upan,

a̱vu upan wa̱ yi wu da'waton le lon.

6 A̱vu u damma,

<<N zuwa ta̱ mogono ma̱ va̱,

ɗe Sihiyona* Aagaɗi Akiza a̱ va̱.>>

7 A̱vu mogono'o u damma,

<<N ta yuwan adanshi e ili i na A̱sulazuva a dammai.✝

A̱vu A̱sulazuva a damma mu, <A̱vu mawun ma̱ va̱ ma ɗa,

ana'an mo o'wo ta̱ dada va̱ wu.

8 Pati mu,

n ta ca wu nɗa mo o'wo agadu a̱ wu,

uvaɗi ma̱ɓula̱ u to o'wo za va̱ wu.

9 Vu ta yuwan tsugono tsa̱ le na aaɗanga a̱ rumu,✝

vu to ɓuɓoso le tsa ayimba.> >>

10 Gogo gba, i yuwan ugbozu,

a̱ɗu ngono,

i ka̱mbuwa̱ ugbozu,

a̱ɗu a̱za̱ a̱ tsugono tsu uvaɗi.

11 I yuwaan A̱sulazuva a̱ga̱nda̱ na̱ wovon,

na̱ meje'en ma̱ lipu.

12 I ka̱ɗa̱to a̱ ma̱ka̱ka̱n ma̱ yi,*

na̱ ne ɗa shi upan wa̱ yi u ta̱ 'yon

a̱vu i kuwa̱,

adama a na upan wa̱ yi u tsu la̱pa̱ 'yon shi.

A̱za̱ a̱ ma̱za̱nga̱ a ɗa

aza a na suru a zama upa'atan uba̱ta̱ wa̱ yi.