1 Zuva ta yuwusan adanshi a tsugbain tsa̱ A̱sula̱!

Eleshe waru a ta yuwusan adanshi a linga ve e ekere a̱ yi!

2 Urana u tsu damma urana suru tsugbain tsa̱ a̱ yi,

ayin a tsu damma ta̱ ayin suru urevu wa̱ yi.

3 Babu adanshi, ko danshi diga uba̱ta̱ u le,

waru babu uɗyo u na a uwwa.

4 Amma suru na̱ ne uɗyo u le u rawa ta̱ a̱tsuma̱ o uvaɗi suru,✝

idanshi i le i rawa ta̱ a̱tsuma̱ o uvaɗi suru.

Ɗe zuva A̱sula̱ a yuwaan ta̱ urana uba̱ta̱ wu nden,

5 wutu wu urana,

u ta̱ tsa vali sa'avu o uta̱sa̱ a aasula a̱yi,

ma̱za̱nga̱ ma̱ yi,

mo rotso ta̱ za vi ilaɗi na ri e ifoɓi i na wa suma.

6 U tsu 'yon ta̱ diga a̱ ncilecile ma zuva,

a̱vu u ka̱nda̱ruwa̱ diga upasu u nda a̱ tyo upasu u ndeɗe,

babu ili i na yaa gura pa'an o usuɗuwu wa̱ yi.

7 Wila̱ wa̱ A̱sulazuva u ta̱ mejege,

u tsu ka̱mba̱to ta̱ wuma usa'avu.

Tsuɓari tsa̱ A̱sulazuva amayun a ɗa,

u tsu zuwa ta̱ za babu majiyan u tsura̱ ugbozu.

8 Udammu wa̱ A̱sulazuva mejege ma ɗa a̱ ri,

a casu okolo ma̱za̱nga̱.

Wila̱ wa̱ A̱sulazuva,

a̱ ri usa̱n u mereve shi,

a tsu ca ta̱ okolo urevu.

9 Wovon wa̱ A̱sulazuva,

u tsu zuwa ta̱ okolo amayun,

a̱ da̱na̱ hali hali.

Wila̱ wa̱ A̱sulazuva amayun a ɗa,

waru a̱za̱ a̱ɓula̱ ɗa suru.

10 Ili i maluwa ma ɗa i na i la'ai zinariya.

Amayun! U la'a ta̱ zinariya can!

A la'a ta̱ ishiki a̱limu.

Amayun! U la'a ta̱ ishiki i na i ri a abaji!

11 O ure u le u ɗa aagbashi a̱ wu a̱ tsu tsura̱ tsuɓari,

uba̱ta̱ u tsutoni u le a̱ tsu tsura̱ ta̱ iliyinkapa ya̱ a̱bunda̱.

12 Zane ɗa aa gura reve nusu va̱ yi?

Vu yuwaan mu gafura vu nusu na n revei shi.

13 Vu wawa mu diga a mayan me ili i na n revei unusu u ɗa.

She vu lyawa ili i na okolo a̱ va̱ a cigai a la'a ucira u va̱ wan!

Tsundolo tsa ɗa mo o'wo za babu unusu,

moo o'wo za babu unusu fa̱a̱n.

14 Lyawa adanshi o una̱ u va̱ na̱ majiyan mo okolo a̱ va̱,

o o'wo ili yu usuwu a̱ ma̱ka̱ka̱n ma̱ wu,

A̱sulazuva,

aatali o upa'atan u va̱ na̱ za va atsupu a̱ va̱!