1 A̱sulazuva,

n to godyoo wu no okolo a̱ va̱ suru,

n ta damma ili i na vu yuwain suru,

yi linga va̱ wu va asalama suru.

2 A̱vu za na La'ai Tsugbain,

n ta yuwan ma̱za̱nga̱ na̱ mere adama a̱ wu,

waru n ta cana ishipa yi ica adama Aala a̱ wu.

3 N'yuwatan n va̱ n rono ta̱ na̱ a̱ca̱pa̱ a na ene nuwu,

reve a̱ ta̱ɗa̱tsa̱ a̱ riya̱ a̱ kuwa̱ a̱ ma̱ka̱ka̱n ma̱ wu.

4 Adama a na uge'etosu u na vu yuwaan numu

u roco ta̱ amayun,

diga o ootogu o tsugono tsa̱ wu,

vu yuwan ta̱ uge'etosu wa̱ a̱ɓula̱.

5 A̱vu ɗa vu ɓarai nɗa,

vu kototoi a̱za̱ e iwuya.

A̱vu ɗa vu ta'asai ala ele hali hali.

6 O kototo ta̱ n'yuwatan hali hali

reve vu kototo ilyuci i le.

Hali e cina ne le suru suru.

7 Amma A̱sulazuva mogono ma ɗa hali hali,

u shuwa̱ ta̱ ootogu o tsugono tsa̱ yi adama o uge'etosu.

8 A̱yi ɗa za na aa yuwusan uge'etosu wu uvaɗi na̱ a̱ɓula̱,

u tsu ge'eto ta̱ nɗa mejege.

9 A̱sulazuva a ɗa uba̱ta̱ wu upa'atan,

uba̱ta̱ wu upa'atan wa aza a na o ɓongishi,

a̱yi uba̱ta̱ wu upa'atan u ɗa a mantsa ma addama.

10 Aza a na e revei Aala a̱ wu

a ta zuwusa ucira ule ya̱'a̱ wu,

agba vu tsu vari a̱za̱ e izami ya̱ wu shi.

11 Canaa yi A̱sulazuva ica,

za na a yuwusan tsugono ɗe Sihiyona!

I damma linga va̱ yi

a̱tsuma̱ a nɗa suru.

12 Adama a na a̱yi ɗa za na tsu tsupusaa

aza a na o unai ozo o ro,

u ta cuwan na aza a na o sowuso a̱tsuma̱lima̱,

waru wa̱ rungwa̱ mesun ma aza a na o ɓongishi shi.

13 A̱sulazuva,

ene iliyali i va̱!

Ka̱lyuwa̱ a̱tsuma̱lima̱

a na aza a na a 'yuwan numu a casu mu,

a̱vu za na a wawusa mu diga o una̱ wu ukwa̱,

14 adama n gura damma ica ya̱ wu

elime a ama a̱ wu a̱za̱ a̱ Sihiyona,

waru n yuwan ma̱za̱nga̱ adama e iwawi ya̱ wu.

15 Nɗa n ka̱pa̱ ta̱ a̱ka̱ri,

reve gba a̱ riya̱ pe.

A̱vu a dasa yakuru na a azuyi,

reve gba u reme ana ele.

16 A̱sulazuva a zuwa ta̱ e reve yi adama o uge'etosu wa̱ a̱ɓula̱ a̱yi.

A̱za̱ e iwuya e reme ta̱ aciyele na̱ linga le.

17 A̱za̱ e iwuya a̱ ta̱ ka̱ra̱ a̱ cipa̱ aason,

ne ɗa fo nɗa

n na e icinai na̱ A̱sula̱.

18 Adama a na mantsa suru ɗa

e icina na aza a na a zamishi ikambishi shi,

waru a kuɗa

uzuwu wo okolo wa̱ a̱za̱ o ulambu shi hali hali.

19 A̱sulazuva, 'yon!

She vu lyawa vaɗilima̱ lyuwa aci a̱ wu wan,

lyawa e ge'eto nɗa a̱ ma̱ka̱ka̱n ma̱ wu.

20 A̱sulazuva,

vu zuwa le e je'en lipu adama o wovon.

Vu zuwa nɗa n reve

a na ele ama a ɗa goon.