1 Wawa tsu A̱sulazuva!

Adama a na babu lo za na ri na̱ a̱ɓula̱ tsa̱ A̱sula̱,

na buwai.

Aza a na adansa amayun a buwa shi

diga a̱tsuma̱ a ama.

2 Vuma suru ta yuwusaan moron ma̱ nden ma̱ yi epen.

A̱ ta̱ luluma̱sa̱ aciyele nu una̱ wu uyo'o.

3 A̱sulazuva,

zuwa elentsu a̱za̱ o una̱ wu uyo'o a̱ rungwa̱ kpaku!

Vu kpa̱to na̱ va̱ a̱za̱ o uvaɗu.

4 Aza a na a dansa,

<<Nu una̱ u tsu u ɗa tsa lyuwa aci.

Waru tsu ta damma ili i na tsu cigai,

za ne ɗa a putsa tsu?>>

5 Amma a̱vu A̱sulazuva a damma,

<<Me ene ta̱ ule'e u na a yuwusaan a̱za̱ o ulambu,

waru mu uwwa ta̱ ma̱nga̱ ma̱ a̱za̱ e izami yi ikambishi.

To, gogo n ta̱ 'yon

n wawa le o una̱ wi ili i na a cigai!>>

6 Adanshi a̱ A̱sulazuva mejege ma ɗa can,

adanshi a̱yi a̱ ta̱ tsa azurufa va̱ni,

azurufa na e jeruwetoi a̱tsuma̱ a akina,

toto ucindere.

7 A̱sulazuva, vu wawa tsu,

diga e ekere a̱za̱ e iwuya waru vu yuwan tsu mapari,

vu yuwan tsu mapari hali hali.

8 Adama a na mɓa̱nga̱ suru,

ama awuya a ta agara,

adama a na wo o'woi a ta cuwusa iwuya,

a̱tsuma̱ a ama.