1 A̱sula̱ a̱ va̱, wawa mu

diga e ekere a n'yuwatan n va̱,

vu yuwaan mu mapari

e ekere aza a na a zuwa numu e elime mantsa suru.

2 Vu wawa mu

e ekere aza a na a yuwusan iwuya,

vu wawa mu

e ekere a̱za̱ o wocosu wu mpasa.

3 A̱sulazuva, ka̱lyuwa̱ cine o voyin

a vawan numu.

A̱za̱ e iwuya oɓolo ta̱ una̱ a aci a̱ va̱,

agba adama e ili ro i ɗa shi, waru n nusan shi.

4 N yuwan unusu u ro shi,

na̱ ne suru a̱ tu ufoɓu u na a̱ riya̱a̱ mu.

'Yon, vu kamba mu,

ka̱lyuwa̱ ili i na i cina numu!

5 A̱sulazuva A̱sula̱ o oɓolo a̱ a̱soja a zuva,

A̱sula̱ a Isra'ila.

'Yon vu ca nɗa suru oforo,

she vu roco a̱za̱ e iwuya

aza a yipalishi iliyali wan. Wivuwun

6 A̱ tsu ka̱mba̱ ta̱ nu ulivu,

a tsuɓari cine vu revei musa̱n,

e igaru a̱tsuma̱ a̱ lyuci.

7 Uwwa ne'e ili i na yoo u uta̱sa̱ a̱ na̱ le,

a̱ ta̱ tsuwusa̱n adanshi tsa mutsun mu pe'eni a dansa,

<<Zane ɗa a uwwa tsu?>>

8 Amma a̱vu A̱sulazuva,

vu tsu zo'oso le ta̱,

aa yuwusaan nɗa ndolo suru ulamu.

9 A̱vu ucira u va̱,

n zuwaa wu ta̱ ucira,

A̱sula̱ a ɗa uba̱ta̱ wu upa'atan wu ucira u va̱.

10 A̱sula̱ a̱ va̱,

a na tsu roco icigi i na i tsu vadala shi,

u ta walaa mu e elime.

U ta zuwa mu n zo'oso aza a na

a yuwusan adanshi a vama aciya̱va̱.

11 Amma she vu una le wan,

A̱sulazuva uba̱ta̱ wu upa'atan wu ucira u tsu,

nna̱ ne shi ama a̱ va̱ a̱ ta̱ e icina.

A̱tsuma̱ o ucira wa̱ wu

vu zuwa le a̱ da̱na̱ a agara e iwau,

a̱vu vu kototo le.

12 Adama a̱ nusu vu na̱ le,

ni idanshi ye elentsu e le,

lyawa ugbawu u le

wo o'wo le maza.

Adama a wisulusa u le

ne epen a na a yuwusan,

13 vu kototo le nu upan,

vu kototo le hali she no koto.

Ne ɗa e reve a na A̱sula̱ a̱ ri o tsugono aci a Yakubu

hali acina ukosu wu uvaɗi. Wivuwun

14 A̱ tsu ka̱mba̱ ta̱ nu ulivu,

a tsuɓari cine vu revei musa̱n,

e igaru a̱tsuma̱ a̱ lyuci.

15 A ta agara e izami yi ilyalya,

agba a tsu yuwan ta̱ upan na̱ a̱ cuwa̱n shi.

16 Amma n ta cana ishipa adama o ucira wa̱ wu,

nu usana n ta cana ishipa

adama e icigi ya̱ wu i na i tsu vadala shi,

adama a na a̱vu ɗa

uba̱ta̱ wu upa'atan wu ucira u va̱

a mantsa ma̱ a̱tsuma̱lima̱.

17 A̱sula̱, a̱vu ɗa ucira u va̱,

n ta canaa wu ishipa yi ica,

a̱vu ɗa upa'atan wu ucira u va̱,

za na o rocosu mu icigi i na i tsu vadala shi.