1 A̱sulazuva, n ta ca wu tsugbain!

Adama a na vu wawa numu,

waru vu lyawa n'yuwatan n va̱

n lyuwa a aci a̱ va̱ shi.

2 A̱sulazuva A̱sula̱ a̱ va̱,

n showen wu ta̱ adama e ikambishi,

reve vu ka̱mba̱to mu gbaga.

3 A̱sulazuva vu uta̱a̱ mu ta̱ diga a aason,

a̱vu vu wawa mu na ma̱a̱ 'ya̱wa̱ a aason.

4 I cana ishipa a̱ tyo

uba̱ta̱ wa̱ A̱sulazuva,

a̱ɗu aza e icigi ya̱ yi,

i cuwa Aala a akiza a̱yi.

5 Adama a na upan wa̱ yi

za mantsa wa'a ɗa,

amma isa'ani ya̱ yi

i ri nu ukosu shi.

Tsu ta gura shon ayin ma̱ɓula̱,

amma a̱vu tsu yuwan ma̱za̱nga̱ nu usana.

6 A mantsa ma na n ri na asuvu nden,

n tsu damma ta̱,

<<Ili yi lo na ya̱ 'ya̱sa̱n mu ugbozu shi.>>

7 A̱sulazuva adama e isa'ani ya̱ wu

vu shuwa̱ mu ta̱ tsa aatali a gbain.

Amma a mantsa ma na vu vadalaa numu ucina̱,

reve wovon u reme mu lon.

8 A̱sulazuva n ta̱ mesun a̱ tyo ya̱'a̱ wu,

vee e ene iliyali i va̱.

9 <<Uda̱shiyi u ne u ɗa a̱a̱ tsura̱ a̱tsuma̱ o ukwisa̱ u va̱?

Uda̱shiyi u ne u ɗa a̱a̱ tsura̱ a̱ ma̱ka̱ra̱a̱ ma̱ va̱ a̱ tyo a aason?

A̱kwa̱kwa̱ aa ta gura cuwa wu?

A ta gura ca adanshi a alabari a sa'ani a̱ wu?

10 A̱sulazuva vu uwwa mu,

waru vee ene iliyali i va̱!

A̱sulazuva vu kamba mu.>>

11 Vu vadala ta̱ a̱tsumola̱ngu a̱ va̱,

wo o'wo ma̱za̱nga̱,

a̱vu vu foɗo utugu wa̱ a̱tsumola̱ngu a̱ va̱,

vo oto mu utugu u ma̱za̱nga̱,

12 adama asuvu a̱ va̱

a canaa wu ica,

a̱ rungwa̱ kpen wan.

A̱sulazuva A̱sula̱ a̱ va̱,

n ta̱ godyowo wu hali hali.