1 N ciga wu ta̱ A̱sulazuva,

a̱vu ɗa ucira u va̱.

2 A̱sulazuva a ɗa aatali o upa'atan u va̱,

ukari u va̱ na̱ zamawawa va̱.

A̱sula̱ a̱ va̱ a̱yi ɗa aatali o upa'atan u va̱,

uba̱ta̱ wa̱ yi u ɗa n tsu pa'an.

A̱yi ɗa a̱a̱ra̱ga̱ a̱ va̱ na aavana e iwawi i va̱,

waru upa'atan u va̱.

3 N tsu ɗe ta̱ A̱sulazuva,

za na rawai ica,

waru u tsu wawa mu ta̱ e ekere a n'yuwatan n va̱.

4 Meleshe mo o ukwa̱ ma̱ nla̱ mu ta̱ kpakpa,

ikeɗu i mala yu ukototosu n la'a ta̱ ucira u va̱.

5 Amunga a aason a katala mu ta̱,

aason a zuwaa mu ta̱ maza.

6 A̱tsuma̱ a̱tsuma̱lima̱ a̱ va̱,

n ɗe ta̱ A̱sulazuva,

reve n showen A̱sula̱ adama e ikambishi.

Diga A̱a̱'isamapaɗa a̱yi wu uwwa ta̱ uɗyo u va̱,

waru mesun ma̱ va̱ ma rawa ta̱ atsuvu a̱yi.

7 Uvaɗi u uje'en ta̱ a̱vu u jinga̱ɗa̱,

reve nkyun vu nsasan fo e je'en a̱ jinga̱ɗa̱,

adama o upan wa̱ yi.

8 Mikyon n ta̱ o uta̱sa̱ a̱ vunu va̱ yi,

akina a malyuwa na akinkina a madala o uta̱sa̱ o una wa̱ yi.

9 U kpa̱tu'wa̱ ta̱ zuva a̱vu u cipa̱,

ne eleshe a̱ lima̱ da̱n za̱la̱ va ana a̱yi.

10 Reve u kumba zuva ve evelu e ikerobobi wu 'yawan zuva,

a̱vu u zura̱ a̱cipa̱.

11 U ka̱mba̱to ta̱ irumbu aapalutsu a̱yi,

reve u sokowo aciya̱yi a̱tsuma̱ e eleshe a̱ lima̱ a̱ mini.

12 Reve imaɗatsu yu uta̱ ta̱ diga e eleshe a̱yi,

reve mini ma atayan oɓolo ne elentsu a akina,

o uta̱ e elime a̱yi.

13 Reve A̱sulazuva a yuwan tsata diga zuva,

reve uɗyo u Mogono me Ili Suru ma yuwan ilama.

14 Reve u tewin aya a̱ yi,

u baza n'yuwatan ma̱ yi.

Ni imaɗatsu ya̱ yi ɗa,

u bete'we nle.

15 A̱vu a̱ kpa̱tu'wa̱ ikyun i mala,

a̱vu ikyun yu uvaɗi yi uta̱ a alanga e eteshe,

o una̱ u tsuɓari tsa̱ A̱sulazuva,

nu ucira u wivuwun wa̱ yi.

16 Diga zuva A̱sulazuva a canana ta̱ ukere wa̱ yi,

wu uta̱ mu,

diga a̱tsuma̱ a̱ mini ma̱ a̱ru'un ɗa,

u papa numu.

17 U wawa mu ta̱,

e ekere a n'yuwatan n va̱ mu ucira,

ne e ekere aza a na a 'yuwan numu,

adama a na a la'a numu ucira.

18 A̱ riya̱a̱ mu ta̱ o urana wa̱ a̱tsuma̱lima̱ a̱ va̱,

amma A̱sulazuva a kamba mu ta̱.

19 Wu uta̱ mu ta̱ a̱tsuma̱ e meleshe,

waru u wawa mu ta̱ adama a na waa uwwusa uyo'o u va̱.

20 A̱sulazuva a tsupa mu ta̱ adama a̱ a̱ɓula̱ a̱ va̱,

u ca mu ta̱ iliyinkapa adama a na e ekere a̱ va̱ a̱ ri nu unusu shi.

21 Adama a na n yuwan ta̱ tsutoni nu ure wa̱ A̱sulazuva,

agba n lyawa A̱sula̱ a̱ va̱ a̱vu n yuwan iwuya shi.

22 N yuwan ta tsutoni na̱ wila̱ wa̱ yi suru,

agba n lyawa ili i na u zuwai a na a̱a̱ kuru shi.

23 N da̱na̱ ta̱ babu unusu a̱ ma̱ka̱ka̱n ma̱ yi,

n tawa ta̱ aciya̱va̱ diga o ure u na maa yuwan unusu.

24 A̱sulazuva a tsupa mu ta̱ adama a̱ a̱ɓula̱ a̱ va̱,

adama a na u reve ta̱ a̱mu za vu unusu ɗa shi e esu a̱ yi.

25 A̱sulazuva vu tsu roco ta̱ a̱ɓula̱ e ekere aza a na a̱ ri na̱ a̱ɓula̱.

Za na ri babu unusu, vu tsu roco ta̱ a̱vu za vu unusu ɗa shi.

26 E ekere a za na ri cece,

vu tsu roco ta̱ aciya̱wu cece.

Agba e ekere a za vi iwuya,

vu tsu roco yi ta̱ tsushu'un.

27 Vu tsu wawa ta̱ aza a na a̱ ka̱ɗa̱toi aciyele,

amma esu a̱ wu a̱ ta̱ uba̱ta̱ wa aza a na a̱ ri na aciyogbamu,

adama vu ka̱ɗa̱to le.

28 A̱sulazuva, a̱vu ɗa ekan a̱ va̱,

a̱vu ɗa vi i ikanai irumbu i va̱.

29 Adama a na ni ikambi ya̱ wu i ɗa ma̱ riya̱a̱ a̱soja o uvon,

ni ikambi ya̱ A̱sula̱ a̱ va̱ a ɗa maa pasa ukari u lyuci.

30 A̱sula̱ gba, re va̱ yi mejege ma ɗa!

Adanshi a̱ A̱sulazuva waru amayun a ɗa!

A̱ra̱ga̱ a ɗa e ekere a za na suru zamiyi upa'atan ya̱'a̱ yi. ✝

31 Zane ɗa A̱sula̱, babu na̱ A̱sulazuva?

Zane ɗa gba aatali o upa'atan,

babu na̱ a̱vu A̱sula̱ a̱ tsu?

32 A̱sula̱ a ɗa za na a casu mu ucira,

waru u tsu zuwa ta̱ re va̱ o o'wo babu unusu.

33 U zuwa mu ta̱ n wala kau kau babu ta̱ɗa̱tsa̱,

cine mere'on ma tsu wala zuva vu nsasan.✝

34 U rito mu ta̱ cine ma yuwan uvon,

adama n gura ni'wa̱n utan wu rumushili.

35 Vu ca mu ta̱ a̱a̱ra̱ga̱ a̱ wu za na wawa numu,

ukere u sa'ani wa̱ wu u guza̱ mu ta̱,

ikambishi ya̱ wu i ca mu ta̱ tsugbain.

36 Vu zuwa mu ta̱ uba̱ta̱ u na u ri na̱ meleshe shi,

agba n riya̱ mantsa mo uvon shi.

37 M gbagba ta̱ n'yuwatan n va̱, a̱vu n kototo le,

mi isawan shi she na n lyuwai aci e le suru.

38 N kototo le ta̱ suru suru, hali a̱ kuɗa̱ 'yon,

a̱vu a̱ riya̱ za̱la̱ va ana a̱ va̱.

39 Vu ca mu ta̱ ucira adama n yuwan uvon,

vu zuwa ta̱ n'yuwatan n va̱ za̱la̱ va ana a̱ va̱.

40 Agba vu zuwa ta̱ n'yuwatan n va̱ a vadala reve a sumaa mu,

a̱vu n kototo aza a na a 'yuwan numu.

41 A sala ta̱ adama a kamba le,

agba babu lo za na a wawa le,

a̱vu a salaa a̱ A̱sulazuva,

agba u usu le shi.

42 N ta̱ luɓa̱tsa̱ le, hali o o'wo tsa̱ ma̱buta̱,

a̱vu n kula̱ le, mu dasa le tso olo'o e re.

43 Vu wawa mu ta̱ e ekere a ama e iwuya a̱ va̱,

vu shuwa̱ mu ta̱ mo o'wo zagbain vu nɗa.

Ama a na n revei shi, o o'wo ta̱ agbashi a̱ va̱.

44 Ele a uwwa adama aɗa a̱ va̱,

a tsu yuwaan mu ta̱ tsutoni,

na̱ meje'en ma̱ lipu

omocin a̱ tsu ta̱wa̱ ta̱ uba̱ta̱ u va̱, adama a ca mu tsugbain.

45 Okolo e le a kuɗa ta̱,

a̱vu o uta̱ na̱ meje'en ma̱ lipu,

diga uba̱ta̱ u na a̱ da̱na̱i upa'awun.

46 A̱sulazuva a̱ ta̱ wuma!

Aba'un za va̱ wu ɗa aatali o upa'atan a̱ va̱!

Tsugbain tsa̱ ta̱ e ekere a̱ A̱sula̱ za vi Iwawi i va̱.

47 A̱yi ɗa A̱sula̱ a̱ va̱ za na a tsupaa mu,

a̱yi ɗa u zuwai nɗa za̱la̱ va̱.

48 U tsu wawa mu ta̱ diga e ekere a n'yuwatan n va̱.

U tsu ca mu ta̱ tsugbain e ekere aza a na a̱ ri a̱ tsushu'un na̱ mu.

U tsu wawa mu ta̱ e ekere a̱za̱ o 'ya̱sa̱sa̱n wu ugbozu.

49 Adama o ndolo, A̱sulazuva,

n ta cuwa wu a̱tsuma̱ a nɗa,✝

n ta cana ishipa yi ica a̱ tyo a Aala a̱ wu.

50 U tsu ca ta̱ mogono ma̱ yi a̱ba̱jini o ulyuwu wa aci,

u tsu roco ta̱ icigi ya̱ yi i na i tsu vadala shi

uba̱ta̱ wu za na u tawai,

e ekere mogono Da̱wuda

nu ugundo wa̱ yi hali hali.