1 She vu yuwan a̱tsumola̱ngu adama aza a na a yuwusan iwuya wan,

ko vu yuwan tsushu'un,

adama aza a na a yuwusan ili i babu ulobonu.

2 A̱ ta̱ 'yewe cine vu revei anlya babu usa̱n,

a ta kpanla babu usa̱n cine vu revei ototopi.

3 Vu zuwa okolo a̱ wu uba̱ta̱ wa̱ A̱sulazuva vu yuwan isa'ani.

Vu da̱nu a̱tsuma̱ e iɗa'a,

vu tsura̱ asuvu nden.

4 Vu zami ma̱za̱nga̱ ma̱ wu e ekere a̱ A̱sulazuva,

u to shitowon wu majiyan mo okolo ma̱ wu.

5 Vu lyawaa A̱sulazuva re wuma va̱ wu,

vu zuwaa yi ucira, u ta̱ ka̱lyuwa̱ wu.

6 U ta zuwa a̱ɓula̱ a̱ wu e ikana,

uge'etosu wa amayun a̱ wu u te ikana,

tse ekan yu urana a aci.

7 Vi isawan kpen a̱ ma̱ka̱ka̱n ma̱ A̱sulazuva,

vu kaɓa asuvu vu zuwa okolo a̱ wu ya̱'a̱ yi,

she vu yuwan a̱tsumola̱ngu nu ulyuwu we elime wu za ro wan,

ko za na a lyuwusa elime,

a̱tsuma̱ e ifoɓi yi iwuya ya̱ yi.

8 She vu lyawa asuvu a̱ wu a̱ 'yon wan,

ko vu yuwan upan wan,

she wovon u reme wu wan,

cu'un ndolo tsu ta̱wa̱ ni ili shi, she iwuya.

9 Adama a na o to kototo,

a̱za̱ e iwuya,

amma aza a na a zuwusa okolo e le uba̱ta̱ wa̱ A̱sulazuva,

iɗa'a u to o'wo agadu ele.

10 Mantsa wa'a a̱za̱ e iwuya a̱ ta̱ puwa̱n,

ko na̱ vu ka̱lyuwa̱ uba̱ta̱ u na a̱ da̱na̱i,

vee ene le waru shi.

11 Amma aza a na a tarai aciyele ili i ro shi,

iɗa'a u to o'wo agadu e le.

Reve a uwwa uyo'o wa a asuvu nden lon.

12 Za vi iwuya tsu yuwaan ta̱

vuma va̱ a̱ɓula̱ ifoɓi iwuya.

U tsu gutanasa yi ta̱

adama a̱ tsushu'un.

13 Amma A̱sulazuva a̱ tsu zo'oso ta̱

za vi iwuya,

adama a na u reve ta̱ urana,

wu kototosu wa̱ yi u ta̱ lo a̱ ta̱wa̱.

14 A̱za̱ e iwuya a tsu tala ta̱ mutsun mu pe'eni,

reve o rono tan le,

tsa̱ra̱ o una alambi na aza a na a cigai ikambishi,

tsa̱ra̱ o una a̱za̱ a̱ɓula̱.

15 Amma mutsun mu pe'eni nle n ta̱ o una le,

waru a kuɗa tan le.

16 Ke'en na za va̱ a̱ɓula̱ ri na̱ a̱ yi,

u la'a ta̱ a̱bunda̱ a na za vi iwuya ri na̱ a̱ yi.

17 Adama a na A̱sulazuva a ta kuɗa ucira wu za vi iwuya,

amma u ta yuwaan za va̱ a̱ɓula̱ mapari.

18 A̱sulazuva a̱ ta̱ ka̱lyuwusa̱ aza a na aa yuwusan yi tsutoni,

iɗa'a u to o'wo za le hali hali.

19 A uwwa wono,

a mantsa ma̱ meleshe shi,

a rana va ambulu,

a̱ ta̱ da̱na̱ ni ilyalya ya̱ a̱bunda̱.

20 Amma a̱za̱ e iwuya a̱ ta̱ puwa̱n,

aza a na a 'yuwain A̱sulazuva,

a̱ ta̱ puwa̱n cine vu revei yipa̱lu yu una,

a̱ ta̱ puwa̱n tsa mikyon.

21 Za vi iwuya,

u tsu lyuwa ta̱ utan agba wa tsupa shi,

amma za̱ va a̱ɓula̱,

u tsu ca ta̱ ne'e no okolo a̱ ta̱.

22 Aza a na A̱sulazuva a zuwaa yi aba'un,

iɗa'a i to o'wo agadu e le,

amma aza a na u yuwayin una̱,

a̱ ta̱ gba̱ra̱ le.

23 Na̱ A̱sulazuva a uwwusa uyo'o,

u wuma u vuma,

u tsu ka̱lyuwusa̱ ta̱ mmalu ma̱ yi na amayun.

24 Ko na̱ u shi u ta̱ɗa̱tsa̱, wa̱a̱ riya̱ shi,

adama a na A̱sulazuva a ɗa a̱ guza̱i ukere wa̱ yi.

25 N da̱na̱ ta̱ mawun

agba gogo n kutsa ta̱,

suru na̱ ne koto me ene

a vari a̱za̱ a̱ɓula̱ shi,

ko muwun nle

a pati ilyalya shi.

26 A̱za̱ a̱ɓula̱ e tse ene ta̱ iliyali mantsa suru,

a̱ tsu ca ta̱ okopu no okolo a̱ ta̱,

waru a ta zuwaa muwun nle aba'un.

27 Vu lyawa iwuya vu yuwan isa'ani,

ne ɗa va̱a̱ da̱nu e iɗa'a hali hali.

28 Adama a na A̱sulazuva,

a ciga ta̱ ili i na i ri mejege,

u tsu vari a̱za̱ a̱ɓula̱ a̱ yi shi.

U ta̱ ka̱lyuwa̱ a̱za̱ a̱ɓula̱ hali hali,

amma u ta̱ kototo muwun ma̱ a̱za̱ e iwuya.

29 A̱za̱ a̱ a̱ɓula̱ a ta tara agadu e iɗa'a

waru a̱ da̱nu pe hali hali.

30 Za va̱ a̱ɓula̱ tsu yuwan ta̱ adanshi nu ugbozu

waru eelentsu a̱ yi a̱ tsu yuwan ta̱ adanshi mejege.

31 Wila̱ wa̱ A̱sula̱ a̱ yi u ta̱ okolo a̱ yi,

u tsu lyawai shi suru suru.

32 A̱za̱ e iwuya a tsu

vawan ta̱ a̱za̱ a̱ a̱ɓula̱,

adama o una le.

33 Amma A̱sulazuva aa lyawa le,

e ekere le shi,

ko u lyawa a yuwaan le

uge'etosu we epen shi.

34 Vu zuwa okolo a̱ wu

uba̱ta̱ wa̱ A̱sulazuva,

vu yuwan tsutoni na̱ wila̱ wa̱ yi.

A̱yi ɗa waa ca wu ucira

waru vu ta̱ ene

a na a̱ gba̱ra̱i a̱za̱ e iwuya.

35 Me ene ta̱ ɗe vuma wuya,

za na tse ene iliyali shi,

a balasa tsu uɗanga wu uta̱nu,

u na u ri e iɗa yu umili.

36 Amma na a tarai mantsa wa'a

na n ka̱mba̱i me ene yi waru shi,

n zami yi ta̱, agba me ene yi shi.

37 Vi idana aza a na a̱ ri a mmalu a̱tsuma̱ amayun,

vi idana vuma va̱ a̱ɓula̱.

Adama a na a̱ ta̱ tsura̱

asuvu n nden o kosu.

38 Amma o to kototo a̱za̱ o unusu suru,

waru o to kototo limatan le.

39 A̱sulazuva a tsu wawa ta̱

a̱za̱ a̱ a̱ɓula̱,

waru a̱yi ɗa

uba̱ta̱ wu upa'atan wu ucira u le

a mantsa ma̱ a̱tsuma̱lima̱.

40 A̱sulazuva a tsu kamba le ta̱

waru u wawa le,

u tsu wawa le ta̱ e ekere a̱za̱ e iwuya,

waru u wawa le,

adama a na a̱ tsu ta̱wa̱ ta̱

uba̱ta̱ wa̱ yi izami yu upa'anta.